Многія мае суразмоўцы яшчэ ня ведалі пра рашэньне Савету Міністраў штомесяц падвышаць акцызы на алькаголь. Але большасьць апытаных людзей ня лічыць, што гэтае ўрадавае рашэньне стымулюе ў беларусаў жаданьне ўжываць больш якасныя напоі:
(Дзяўчына: ) “Я думаю, што можна стымуляваць, калі так падвысіць цэны. Не ва ўсіх будзе дастаткова грошай усё гэта купляць”.
(Карэспандэнт: ) “А ўвогуле як вы ставіцеся да гэтага рашэньня ўраду?”
(Дзяўчына: ) “Няхай падвышаюць, будуць менш піць”.
(Спадар: ) “Гэта выкліча супраціў. Труціліся людзі. Цяпер менш п’юць гэтай атруты. А цяпер будуць самі рабіць, труціцца й гінуць”.
(Іншы спадар: ) “Лепш на пладовыя віны зьнізіць цэны. На каньяк ці гарэлку можа і правільна, што падвышаюць, а вось віна выпіць чалавеку 100–200 грамаў — гэта часам не пашкодзіць. Трэба зьніжаць цэны”.
(Хлопец: ) “Нічога не атрымаецца. Калі ў чалавека такі жыцьцёвы ўзровень, ён заўсёды знойдзе грошы ды купіць тое віно, якое яму падабаецца. Калі ў яго няма нутранога стрыжня, ён будзе піць абы-што. І яму ня будзе сорамна”.
(Спадарыня: ) “Мне здаецца, гэта ніяк не паўплывае на тое, што людзі будуць піць. Каму ня будзе хапаць на якасны прадукт, тыя будуць спажываць няякасныя напоі. У нашым грамадзтве вялікі падзел паміж невялікай колькасьцю людзей, што спажываюць якасныя прадукты, апранаюцца добра, і тымі, хто ня ў стане на сваю зарплату купляць якасныя прадукты”.
(Спадар: ) “Ня будзе спрыяць спажываньню якасных напояў. Я да гэтага стаўлюся недадатна”.
(Дзяўчына: ) “Думаю, гэта не паўплывае, і людзі ўсё роўна будуць купляць тыя ж напоі. Але гэта прынясе ўраду больш грошай”.
(Спадарыня: ) “Ведаеце, правільна робяць, таму што вельмі шмат у нас п’юць, і п’юць гэтыя танныя віны. Шмат хто труціцца. Лепей няхай купляюць натуральнае віно”.
(Хлопец: ) “Відаць, ёсьць сэнс падвышаць цэны на моцныя алькагольныя напоі — на гарэлку ці пладовыя віны. Гэтым якраз можна стымуляваць. Але няма сэнсу падвышаць цэны на піва ці вінаградныя віны”.
Гэткія меркаваньні людзей пра ўрадавае рашэньне падвысіць цэны на алькагольныя напоі.
