Навіны 21 сьнежня 2000 г.

Новы год Расея распачне з новым — лінейным падаходным падаткам, які складзе 13%. Фіскальная рэформа ў суседняй краіне пэўным чынам адаб'ецца і на беларускай эканоміцы. У першую чаргу, працягнецца далейшая экспансія расейскага капіталу на нашыя рынкі. Бо й цяпер у крамах некаторыя расейскія тавары таньнейшыя за беларускія. А з увядзеньнем новага падаходнага падатку яны яшчэ больш патаньнеюць, і беларускія тавары ня здолеюць канкураваць зь імі па кошце.

Ужо цяпер значная частка беларускіх бізнэсоўцаў рэгіструе свае фірмы ў Расеі, бо там цяпер больш зручнае фіскальнае заканадаўства. Як прагназуе вядучы экспэрт цэнтру "Стратэгія" Яраслаў Раманчук, хутка да іх далучацца і іншыя беларускія бізнэсоўцы:

(Раманчук: ) "Са ста тысячаў зарэгістраваных прадпрыемстваў, якія яшчэ засталіся і працуюць у Беларусі, адсоткаў 40, найбольш мабільных, накіруюцца ў Расею.

Але ў падпісаных паміж Расеяй і Беларусьсю пагадненьнях ёсьць пункт пра прывядзеньне ў адпаведнасьць расейскага і беларускага заканадаўства. А гэта было б карысна для беларускіх уладаў, але яны гэтага проста не разумеюць і губляюць кантроль над плынямі нацыянальнага капіталу. На жаль, яго становіцца ўсё менш і менш, і ён працуе на іншыя краіны", — зазначыў Яраслаў Раманчук.

А як мяркуе віцэ-прэзыдэнт беларускага Саюзу прадпрымальнікаў Аляксандар Патупа, перамены ў фіскальнай палітыцы Расеі без адпаведных зьменаў у Беларусі добра дэманструюць, што сабою ўяўляе саюз паміж Беларусьсю й Расеяй.

Экспэрты прагназуюць далейшы вываз капіталаў зь Беларусі. Бо цяпер кампаніям, што працуюць у Беларусі, больш выгодна працаваць у якасьці прадстаўнікоў расейскіх ды іншых кампаніяў. Наступствы гэтых працэсаў тлумачыць Яраслаў Раманчук:

"Калі Беларусь афіцыйна не адрэагуе на гэта, дык, я мяркую, што ў 2002 годзе 60% малога й сярэдняга прыватнага бізнэсу ў нас будзе расейскага паходжаньня, але на самрэч гэта будуць беларускія грошы", — адзначыў Яраслаў Раманчук.