Рашэньне Зянона Пазьняка застаецца ў цэнтры ўвагі палітыкаў. Сваю ацэнку гэтага кроку мы папрасілі даць намесьніка старшыні БНФ Юрася Хадыку. (Хадыка:) «Права кожнага кандыдата ў дэпутаты як вольна вылучацца, так і вольна здымаць сваю кандыдатуру з выбарчага працэсу. У гэтым не было б ніякай небясьпекі, калі б некаторыя крокі Зянона Станіслававіча не стваралі пагрозу для заканчэньня выбарчай кампаніі. Сойм некалькі разоў разглядаў праблему прэзыдэнцкіх выбараў і прыйшоў да адназначнага рашэньня - неабходнасьці даводзіць выбарчую кампанію да канца. Аднак адначасна і нават крыху загадзя да зьняцьця сваёй кандыдатуры Пазьняк аддаў загад, часткова рэалізаваны, на жаль, каб людзі, прыхільнікі БНФ, пакідалі выбарчыя камісіі. Гэта ёсьць парушэньнем Статуту, таму што ніхто з членаў БНФ, і яго старшыня, ня можа парушаць рашэньні калектыўнага органа і прымаць аднаасобныя рашэньні па такіх важных палітычных праблемах. Таму я б вельмі хацеў, каб праз вашую радыёстанцыю нашыя прыхільнікі даведаліся аб неабходнасьці працягу выбарчай кампаніі да яе завяршэньня. Інакш усе тыя ахвяры, якія прынесьлі тысячы прыхільнікаў БНФ, падвяргаючыся арыштам, штрафам, выгнаньню з працы, пойдуць пылам. І каб нашая годнасьць, годнасьць усёй беларускай апазыцыі не ператварылася ў нішто, таму што зрыў кампаніі - не зьняцьцё кандыдатуры, а зрыў кампаніі - самае небясьпечнае, што можа нас чакаць у гэтай сытуацыі». (Радкевіч:) Юрый Віктаравіч,Вы знаёмыя, відаць, з факсаў Зянона Пазьняка з тымі аргумэнтамі, прычынамі - чаму ён прыняў такое рашэньне. Гэтая, на думку Зянона Пазьняка, фальсыфікацыя выбараў, гэтыя лічбы, якія кожны дзень усё большаюць і якія выклікаюць у яго недавер... Як бы Вы маглі пракамэнтаваць аргумэнты, якія ён выклаў у якасьці падставы для зьняцьця сваёй кандыдатуры? (Хадыка:) «Нават калі б там не было ні аднаго аргумэнта, то права Пазьняка сваю кандыдатуру зьняць. Але, скажам, гэтыя шматлікія заявы пра фальсыфікацыю вольна ці нявольна кідаюць цень на Беларускі Народны Фронт, таму што большасьць членаў выбарчай камісіі зьяўляецца членамі БНФ. І ніколі ні Сойм, ні ягонае кіраўніцтва не заклікалі людзей да фальсыфікацыі, а толькі да выкананьня закону і свайго грамадзянскага абавязку, добрасумленнасьці ў першую чаргу». Выбарчая кампанія гэта вельмі адказны дэмакратычны працэс, і ў мяне няма падставаў думаць, што члены БНФ займаліся сьвядомай фальсыфікацыяй. Усё астатняе - адказнасьць Цэнтральнай выбарчай камісіі, якую ў сёньняшняй сытуацыі можна крытыкаваць, можна разумець некаторыя адхіленьні, якія, магчыма, ёсьць. Але я яшчэ раз хачу падкрэсьліць: гэта ня ёсьць нашымі паўнамоцтвамі, гэта паўнамоцтвы Цэнтральнай выбарчай камісіі. Яна нясе цалкам адказнасьць за вынікі выбараў.
Самае папулярнае
1