У турме на Валадарскага абвясьцілі галадоўку вязьні

«Хочам заявіць, што спыняем ад 00 гадзінаў 00 хвілінаў 22 лютага 2012 г. усялякі прыём ежы. Просім адміністрацыю СІЗА-1 Менску зьняць нас з харчовага забесьпячэньня і спыніць прыём любых перадачаў на нашы прозьвішчы», — напісана ў лісьце.

Далей вязьні, справа якіх у той час слухалася ў Беларускім вайсковым судзе, тлумачаць прычыну свайго кроку: «Падчас папярэдняга расьсьледаваньня нашай крымінальнай справы супрацоўнікамі ўпраўленьня па барацьбе з арганізаванай злачыннасьцю, з маўклівай згоды сьледчага Вашкевіча С.П., мелі месца грубыя парушэньні закону, што выявілася ў фальсыфікацыі матэрыялаў крымінальнай справы, ціску на сьведак, пацярпелых, абвінавачаных, з мэтай прымусіць іх даць патрэбныя паказаньні, штучным разьдзіманьні значнасьці нашай крымінальнай справы з мэтай дэманстрацыі нібыта высокіх паказчыкаў сваёй працы», — пішуць вязьні СІЗА-1.

Абвінавачаныя далей адзначаюць , што ўсё гэта пацьвердзілася ў судзе, калі «падчас слуханьняў каля 60 (!!!) сьведак, пацярпелых, абвінавачаных далі канкрэтныя паказаньні пра грубы ціск на іх з боку супрацоўнікаў ГУБАЗ (Галоўнага ўпраўленьня па барацьбе з арганізаванай злачыннасьцю. — РС)... Цалкам відавочна, што немагчыма прымусіць такую колькасьць зусім розных людзей адначасова пад прысягай агаворваць супрацоўнікаў праваахоўных органаў».

Аўтары ліста заклікаюць Генэральнага пракурора Рэспублікі Беларусь «правесьці аб’ектыўную і ўсебаковую праверку грубых парушэньняў закону з боку супрацоўнікаў ГУБАЗ МУС РБ, узяўшы яе правядзеньне пад асабісты кантроль».

Абвінавачаныя прыводзяць прыклады прававой сваволі з боку супрацоўнікаў ГУБАЗ, якія неаднаразова заяўлялі падсьледным, што «судзьдзі будуць выносіць такія прысуды, якія патрэбныя ўпраўленьню барацьбы з арганізаванай злачыннасьцю», і падкрэсьлівалі, што ГУБАЗ мае «неабмежаваны ўплыў на ўсе органы дзяржаўнай улады ў Рэспубліцы Беларусь з-за наяўнага кампрамату на ўсіх службовых асобаў, у тым ліку службовых асобаў судовай сыстэмы Рэспублікі Беларусь».

Паводле фактаў, выкладзеных у дакумэнце, інфармацыйна-асьветніцкая ўстанова «Плятформа» накіравала звароты Генпракурору і ў Дэпартамэнт выкананьня пакараньняў Беларусі.

Дзяжурны турмы заявіў «Свабодзе», што ня мае зьместак пра галадоўку вязьняў і што пра такое ня чуў.

Як паведаміла «Свабодзе» намесьніца кіраўніка «Плятформы» Алена Красоўская, пра ўчынак вязьняў «Валадаркі» праваабаронцам распавялі іхнія блізкія. Што сёньня з галадоўнікамі — сваякам невядома.

«Найбольш абурае і палохае тое, што людзі за кратамі сапраўды вычарпалі ўсе магчымасьці прыцягнуць увагу да сваёй крымінальнай справы, — адзначае Алена Красоўская. — Зьняволеныя ідуць на крайнія меры, а на іх часьцяком ужо ніхто не зьвяртае ўвагі... Чарговым разам „Плятформа“ мусіць з жалем канстатаваць, што адмова нашым супрацоўнікам у доступе ў беларускія пэнітэнцыярныя ўстановы адбіваецца найперш на лёсе нашых грамадзянаў за кратамі ды іхніх сем’яў на волі. З-за высокіх сьценаў калёніяў ды СІЗА людзі ня могуць дагрукацца да тых, хто павінен кантраляваць выкананьне законнасьці ў рэжымных установах. Каб быць пачутымі, яны вымушаныя ісьці на галадоўкі, ускрыцьцё венаў ды іншыя віды суіцыдаў», — заявіла Красоўская.