НАДВОР'Е
Усё яшчэ сьцюдзёна. Абяцаюць да – 22 градусаў. Але да канца тыдня нібыта пацяплее.
У БЕЛАРУСІ І СЬВЕЦЕ:
Менск. У Міністэрстве замежных спраў Беларусі (вул. Леніна, 19) брыфінг начальніка ўпраўленьня інфармацыі Андрэя Савіных. Пачатак у 11.00.
Менск. У офісе прафсаюза РЭП (вул. Кульман, 4) прэс-канфэрэнцыя арганізатараў «Народнага байкоту парлямэнцкіх выбараў у Беларусі», прысьвечаная старту кампаніі. Пачатак у 12.00.
Менск. У офісе партыі БНФ (вул. Чарнышэўскага, 3) брыфінг кіраўніцтва партыі, прысьвечаны дзеяньням у перадвыбарнай кампаніі. Пачатак у 12.00.
Менск. У музэі Янкі Купалы (вул. Янкі Купалы, 4). Прэзэнтацыя трох дыскаў сьпявачкі Тацяны Матафонавай «З новым годам!», «Шыпшына» і «Пасьпеўкі». У праграме шмат жывой музыкі. Уваход вольны. Пачатак у 18.00.
Брусэль. Сустрэча Міністраў абароны краінаў НАТА.
* * *
У вечаровым эфіры Свабоды – зваротная сувязь: перадача «Паштовая скрынка 111», лісты слухачоў чытае і камэнтуе Валянцін Жданко. Зьміцер Бартосік запросіць у падарожжа ў Мікашэвічы, а Аляксандра Дынько ў перадачы «Вашы дзеці» прапануе тэму: «Як быць маці-адзіночкай у Беларусі». Гераіня яе расповеду – Наста Азарка.
* * *
Паважаныя наведнікі сайту! Дапамажыце больш поўна прадставіць беларускі дзень – дашліце інфармацыю пра плянаваныя падзеі, якія будуць цікавыя нашым чытачам, на адрас svaboda@rferl.org.
ТАКСАМА Ў ГЭТЫ ДЗЕНЬ:
1348 – перамога войскаў Вялікага княства Літоўскага над крыжакамі на рацэ Стрэва (прыток Нёмна). У бітве загінуў князь Нарымонт, другі сын Гедыміна. Нарадзіўся каля 1294 г.
1589 – кароль Жыгімонт ІІІ Ваза пацьвердзіў усе прывілеі Горадні.
1943 – капітуляцыя немцаў пад Сталінградам. Заканчэньне Сталінградзкай бітвы.
1968 – адкрыўся літаратурна-этнаграфічны музэй у в. Гудзевічы Мастоўскага р-ну.
Нарадзіліся:
1494 – каралева і вялікая княгіня Бона Сфорца, якая ўвайшла ў гісторыю Беларусі маштабнымі аграрнымі рэформамі.
1838 – Кастусь Каліноўскі, ідэоляг вызваленьня Беларусі, кіраўнік паўстаньня 1863 году.
1882 – Джэймс Джойс, ірляндзкі паэт і пісьменьнік, аўтар знакамітага раману «Уліс», які на беларускую мову пераклаў наш калега Ян Максімюк.
Памёрлі:
1746 – Мікалай Фаўстын Радзівіл, дзяржаўны і вайсковы дзяяч ВКЛ .
1996 – Алесь Звонак, пісьменьнік, перакладчык, вязень сталінскіх турмаў.
ЁСЬЦЬ НАГОДА:
Сусьветны дзень водна-балотных нетраў.
Беларусы-каталікі адзначаюць Грамніцы або Стрэчаньне – дзень сустрэчы зімы зь летам. Лічыцца, што ўжо могуць быць грымоты, навальніцы і што прайшла палова зімы. Пра гэта сьведчыць прыказка: «На Грамніцы палавіна зіміцы».
ЦЫТАТА НА ПАМЯЦЬ:
Толькі тады, народзе, зажывеш шчасьліва, калі над табою Маскаля ўжэ ня будзе!
Кастусь Каліноўскі
ГОД ТАМУ Ў ЗАГАЛОЎКАХ НА САЙЦЕ «СВАБОДЫ»:
Павел Шарамет: Эўрапейскія бюракраты такія ж амаральныя, як і расейскія
Эўропа прадказвае Лукашэнку будучыню ўцекача
Гардзіеўскі: «На Захадзе супрацоўнікаў КДБ вылічаць па вачах»