Паводле старшыні камітэту Нізамі Джафарава, распрацаваньнем канцэпцыі дэрусіфікацыі шэсьць месяцаў займалася камісія Акадэміі навук Азэрбайджану, тым ня менш пакуль што канчаткова ня вызначана, якое аблічча прозьвішчы будуць мець у выніку рэформы.
Цяпер бальшыня азэрбайджанскіх прозьвішчаў мае мужчынскія формы на -аў /-еў і жаночыя на -ава /-ева. Гэтыя формы разглядаюцца як спадчына расейскіх уплываў. Пасьля 1991 году частка азэрбайджанцаў ужо зьмяніла свае прозьвішчы, або проста адкідаючы “расейскія канчаткі” (напрыклад, замест Ісмаілава – Ісмаіл), або заменьваючы іх на -лы.
Мяркуецца, што з прыняцьцем памянёнага закону ў Азэрбайджане будзе ўведзена абавязковае рэгуляваньне імёнаў і прозьвішчаў нованароджаных, а ўсіх астатніх будуць заахвочваць дэрусіфікаваць свае прозьвішчы.