Лінкі ўнівэрсальнага доступу

Марыхуана, порна, кантроль зброі, сьмяротнае пакараньне і новы штат — за што прагаласавалі ў ЗША, акрамя прэзыдэнта


Мітынг у падтрымку прапановы пра легалізацыю марыхуаны каля Белага дому ў Вашынгтоне. Красавік 2016-га. Фота Rena Schild ©Shutterstock.

Мітынг у падтрымку прапановы пра легалізацыю марыхуаны каля Белага дому ў Вашынгтоне. Красавік 2016-га. Фота Rena Schild ©Shutterstock.

Адначасова з выбарамі прэзыдэнта, губэрнатараў 12 штатаў і «давыбарамі» ў Кангрэс ЗША амэрыканцы галасавалі 8 кастрычніка па 156 пытаньнях у 36 штатах. Паводле папярэдніх вынікаў галасаваньня, наступным прэзыдэнтам ЗША мае стаць рэспубліканец Доналд Трамп, рэспубліканцы захаваюць бальшыню ў Кангрэсе.

Поўны сьпіс прапанаваных пытаньняў прыводзіць Ballotpedia.

Ужываньне марыхуаны ў мэдычных і рэкрэацыйных мэтах дазволілі выбарнікі ў Каліфорніі, Масачусэтсе, Нэвадзе, толькі ў мэдычных мэтах — у Арканзасе, Паўночнай Дакоце і Флорыдзе, але прапанову па легалізацыі ў рэкрэацыйных мэтах адхілілі ў Арызоне. У мэдычных мэтах марыхуану ўжо можна ўжываць у Аклахоме, Арызоне, Вісконсіне, на Гаваях, у Джорджыі, Люізіяне, Мічыгане, Мантане, Нью-Гэмпшыры, Нью-Джэрзі, Нью-Мэксыка і Пэнсыльваніі, для некаторых хваробаў у Аёве. Марыхуана цалкам легальная для мэдычных і рэкрэацыйных мэтаў на Алясцы, у Арэгоне, Вашынгтоне і Каларада.

Сьмяротнае пакараньне было зацьверджанае як дазволены мэтад пакараньня ў Аклахоме і Нэбрасцы. Каліфорнія, якая не ўжывала сьмяротнае пакараньне ўжо 6 гадоў, паводле папярэдніх вынікаў падтрымала прапанову аб захаваньні сьмяротнага пакараньня і паскарэньні працэдуры.

Мінімальныя заробкі ў Арызоне, Мэне і Каларада падымуцца да 12 даляраў на гадзіну да 2020 году, у Вашынгтоне — да 13,5 даляра. Паўднёвая Дакота адхіліла прапанову аб зьніжэньні мінімальнага заробку для непаўналетніх (мінімальны заробак у штаце — 8,55 даляра на гадзіну).

Захады супраць зьмены клімату былі адхіленыя ў Вашынгтоне, дзе маглі ўвесьці падатак на выкіды вуглякіслага газу, але ў Флорыдзе ня сталі абмяжоўваць хатнія гаспадаркі ў продажы электрычнасьці з сонечных батарэяў.

Кантроль над продажам зброі ўзмацнілі ў Вашынгтоне, там суды атрымалі права абмяжоўваць права валодаць зброяй асуджаным. Каліфорнія прыняла патрабаваньне спраўджваць біяграфіі пакупнікоў боепрыпасаў і забараніла мець магазыны на шмат патронаў. Нэвада пашырыла праверкі біяграфіі пакупнікоў зброі і запатрабавала праводзіць перадачу зброі празь ліцэнзаванага дылера. Але штат Мэн, паводле папярэдніх вынікаў, хутчэй за ўсё, адхіліць прапанову мільярдэра Майкла Блумбэрга аб унівэрсальных праверках біяграфіі.

Рабаваньне крамы зброі ў Тэхасе

Рабаваньне крамы зброі ў Тэхасе

Ахова здароўя паводле «сыстэмы адзінага платніка» (фактычна, дзяржаўная ахова здароўя, а не прыватная, як цяпер у ЗША) не была прынятая ў Каларада, які мог стаць першым штатам з такой сыстэмай. Каліфорнія адхіліла прапанову, паводле якой ад дзяржаўных агенцтваў патрабавалася б купляць лекі па цэнах не вышэйшых, чым Міністэрства па справах вэтэранаў плоціць за выпісаныя лекі (гэта магло б зьнізіць цэны на лекі; вытворцы лекаў патрацілі 109 млн даляраў на кампанію супраць прапановы).

Эўтаназія, альбо суіцыд з дапамогай у выпадку невылечнай хваробы ў тэрмінальнай стадыі, цяпер легальная ў Каларада, калі пацыенту і так прагназуецца сьмерць цягам 6 месяцаў.

Падвышэньне падаткаў на тытунь не падтрымалі, паводле папярэдніх вынікаў, Каларада, Місуры, Паўночная Дакота, падтрымала толькі Каліфорнія.

Барацьба зь беспрытульнасьцю пойдзе рознымі шляхамі ў Лос-Анджэлесе і Сан-Францыска. Лос-Анджэлес прыняў 10-гадовую інвэстыцыйную праграму на 1,2 млрд даляраў па дапамозе ў будаўніцтве жытла, а Сан-Францыска забараніў бяздомным жыць у намётах.

Выкарыстаньне прэзэрватываў у порнафільмах зрабілі абавязковым у Каліфорніі (порнаіндустрыя пераконвала, што ў ёй ужываюцца дастаткова надзейныя тэсты на захворваньні).

Забарону плястыкавых пакетаў, верагодна, прымуць у Каліфорніі, якая можа стаць першым штатам, які забароніць прадаваць аднаразовыя пакеты, не прыдатныя да перапрацоўкі (фактычна забарона ўжо дзейнічае на Гаваях і ў акрузе Калюмбія).

Права на паляваньне і рыбалку замацавалі Індыяна і Канзас.

Сталіца вырашыла стаць новым штатам — горад Вашынгтон, акруга Калюмбія, прагаласаваў за ператварэньне ў штат. Цяпер гэтае рашэньне мае ўзгадніць Кангрэс. Назву магчымага штату яшчэ не прынялі (ужо ёсьць штат Вашынгтон, а ў Паўднёвай Амэрыцы — краіна Калюмбія), як варыянт прапануецца Нью-Калюмбія.

Паказаць камэнтары

XS
SM
MD
LG