Лінкі ўнівэрсальнага доступу

У ноч дэнамінацыі чакаюцца перабоі з банкаматамі


Фота ©Shutterstock

Фота ©Shutterstock

Зьняць наяўныя грошы, аплаціць усё магчымае і сплаціць падаткі некаторыя рэкамэндуюць яшчэ да 29 чэрвеня.

Ад 23 гадзін чацьвярга, 30 чэрвеня, да раніцы наступнага дня магчымыя перабоі ў працы банкаматаў і банкаўскіх паслугаў. У асобных выпадках перабоі могуць працягнуцца да панядзелка, 4 ліпеня. У гэты час могуць не працаваць апэрацыі па банкаўскіх картках, у тым ліку па беларускіх картках за мяжой.

Беларусбанк папярэджвае, што сотні банкаматаў ня будуць функцыянаваць ужо за дзень да дэнамінацыі, з 30 чэрвеня, бо напоўніць банкаматы новымі банкнотамі — патрэбны час.

Альфа-Банк піша , што банкаматы ня будуць працаваць з 11 вечара 30 чэрвеня да 7 раніцы 1 ліпеня, а апэрацыі ў плацёжных тэрміналах будуць спыненыя з 18:00 30 чэрвеня да 9 раніцы 2 ліпеня. Праца аддзяленьняў банку спыніцца а 16 гадзіне 30 чэрвеня і адновіцца толькі 4 ліпеня.

Прыёрбанк інфармуе, што з 23 гадзін 30 чэрвеня да 9 раніцы 1 ліпеня ўсе апэрацыі з банкаўскімі карткамі будуць недасяжныя, а да 3 ліпеня ўключна магчымыя часовыя перабоі.

Тое ж абяцае БелВЭБ. Гэты банк 30 чэрвеня будзе працаваць у рэжыме сьвяточнага дня, а 1 ліпеня пачне працу а 12 гадзіне дня, з 30 чэрвеня да 4 ліпеня аддзяленьні банку, абменныя пункты, банкаматы і тэрміналы будуць працаваць у абмежаваным рэжыме.

Банк ВТБ «адключыцца» а 14 гадзіне 30 чэрвеня, адновіць працу а 10 раніцы 1 ліпеня. Але адзначаецца, што з 10 раніцы 27 (!) чэрвеня па 10 раніцы 1 ліпеня ў банку будзе немагчыма зьдзяйсьняць апэрацыі па картках іншых банкаў. Свае карткі ў ВТБ ня будуць працаваць ад 23 гадзін 30 чэрвеня па 5 раніцы наступнага дня.

На гадзіну пазьней адключацца апэрацыі па картках у Белгазпрамбанку: ад 12 ночы 1 ліпеня па 6 раніцы гэтага ж дня

МТБанк рэкамэндуе зьняць пэўную суму наяўных на траты ў пэрыяд з 30 чэрвеня па 3 ліпеня і рэкамэндуе не адкладаць гэта да 29 ці 30 ліпеня, а зрабіць яшчэ раней. Таксама раяць раней унесьці плацяжы па крэдытах, паслугах сувязі і іншым.

Але некаторыя банкі, як Белінвэстбанк, БПС ці Белаграпрамбанк, яшчэ не паведамляюць пра магчымыя праблемы і адключэньні на час дэнамінацыі.

Ад 1 чэрвеня ў беларускіх грошай «адкінуць» чатыры нулі, 10 тысяч стануць адным новым рублём. Старыя купюры ўзору 2000 года будуць паралельна хадзіць разам з новымі, надрукаванымі ў 2009 годзе, да канца 2016 года. Старшыня Нацбанку чакае «стаўленьня з гумарам» да «пэўных рэчаў» падчас дэнамінацыі.

XS
SM
MD
LG