Аляксандар Лукашэнка паставіў задачу дзяржаўным органам сыстэмы бясьпекі захаваць стабільнасьць у краіне, забясьпечыць законнасьць і правапарадак.
УЖЫВУЮ. Выбары-2020. Як праходзіць прэзыдэнцкая кампанія падчас пандэміі
Заява прагучала падчас нарады ў пытаньнях дзейнасьці дзяржаўных органаў нацыянальнай бясьпекі, перадае БелТА.
«Вы бачылі, як супэрдэмакратычныя дзяржавы абышліся з пратэстоўцамі»
«Дэмакратыя дэмакратыяй, але сваволі быць не павінна, — казаў Лукашэнка. — І ня будзе. Вы бачылі, у Злучаных Штатах, Заходняй Эўропе як супэрдэмакратычныя дзяржавы абышліся з пратэстоўцамі.
Галоўная задача дзяржаўных органаў сыстэмы нацыянальнай бясьпекі — захаваць стабільнасьць у краіне, забясьпечыць законнасьць і правапарадак. Тое, чаго ад вас патрабуюць Канстытуцыя і закон».
«Вакол парушэньні заканадаўства, больш за тое, этычных нормаў, абразы»
Паводле Лукашэнкі, нездарма асноўная ўвага цяпер надаецца правядзеньню выбарчай кампаніі.
«Усяго тры тыдні як стартавала гэтая выбарчая кампанія, а ўжо сёньня бачым, што далёка ня ўсе кандыдаты ў кандыдаты маюць намер прайсьці гэты шлях цывілізавана, — заявіў ён сілавікам. — Вакол парушэньні заканадаўства, больш за тое, этычных нормаў; абразы, выпады ў бок улады.
Ёсьць і такія, хто лічыць, што для дасягненьня мэты ўсе сродкі добрыя. Тое, што ў барацьбе за сымпатыі насельніцтва яны выкарыстоўваюць выключна папулісцкія лёзунгі і нічым не падмацаваныя абяцаньні, — гэта хай разьбіраюцца самі людзі. Народ разьбярэцца».
Лукашэнка зьвярнуў увагу на недапушчальнасьць ператварэньня збору подпісаў у несанкцыянаваныя мітынгі і масавыя мерапрыемствы з «парушэньнем усіх мажлівых і неймаверных законаў і нормаў маралі».
Ён заявіў, што дапусьціць парушэньняў закону нельга, бо «пасьля давядзецца за гэта вельмі дорага заплаціць».
І спаслаўся на прыклад Украіны. Закон павінен быць бездакорна выкананы, падкрэсьліў ён.
За пагрозы дзяржаўным службоўцам — крымінальную справу
Лукашэнка запатрабаваў прыцягваць людзей да адказнасьці за «факты агрэсіўных дзеяньняў да прадстаўнікоў органаў правапарадку» і пагрозы дзяржаўным службоўцам. Паводле яго, цяпер «з усіх бакоў сыплюцца пагрозы» як «людзям у пагонах», так і ў адрас «дзяржаўных службоўцаў, кіраўнікоў участковых камісіяў, якія праводзілі парлямэнцкія выбары, у адрас іх семʼяў».
На гэтыя пагрозы Лукашэнка папрасіў «зьвярнуць самую сур’ёзную ўвагу» генэральнага пракурора, старшыню Сьледчага камітэту і міністра ўнутраных справаў. Ён нагадаў, што такія пагрозы — крымінальнае правапарушэньне.
«Пасьля яны сфармуюць каманды баевікоў...»
На думку Лукашэнкі, падзеі разьвіваюцца паводле «загадзя прадуманага сцэнару», а ва ўдзельнікаў «гаспадары з грашыма». Спачатку, сказаў ён, прадстаўнікі ініцыятыўных групаў «злоўжываюць правам на правядзеньне пікетаў для расхістваньня сытуацыі і дэстабілізацыі абстаноўкі».
«Потым яны сфармуюць каманды і групы баевікоў, якія, ня выключана, захочуць арганізаваць пабоішча на плошчы, — спрагназаваў Лукашэнка. — Да гэтага яны і заклікаюць людзей. Чаму тут зьдзіўляцца? Чаго так усё дзівяцца: „Як Лукашэнка адкажа“? Адказ будзе адзін, вы добра разумееце».
Плошча 2010
Пытаньне «як Лукашэнка адкажа» ён прамовіў па-беларуску, астатняе гаварыў на расейскай мове. Ён дадаў, што «мы гэта ўжо праходзілі», «не дапусьцілі расколу тады ў грамадзтве, не дапусьцім і цяпер».
«Нашым людзям ня варта залішне напружвацца і перажываць, — адзначыў Лукашэнка. — Мы павінны забясьпечыць кожнаму чалавеку магчымасьць спакойна хадзіць па сваёй зямлі, а бацькам, як гэта заўсёды было ва ўсіх нашых гарадах, спакойна ня проста хадзіць па зямлі, а з маленькімі дзеткамі за руку ў любы час дня, і ганарыцца сваёй краінай. Краіна павінна быць спакойнай, нягледзячы ні на якія вострыя сытуацыі».
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
