Лінкі ўнівэрсальнага доступу

Праблему Данбасу вырашыць толькі вайна, — Тымчук


Дзьмітры Тымчук
Дзьмітры Тымчук

Магчымасьці вырашыць канфлікт у Данбасе дыпляматычным сродкамі на дадзены момант вычарпаныя, перакананы вайсковы экспэрт, дэпутат Вярхоўнай Рады, каардынатар руху «Інфармацыйны супраціў» Ўкраіны Дзьмітры Тымчук.

У мінулую суботу ў Менску адбылася чарговая сустрэча Трохбаковай кантактнай групы па ўрэгуляваньні сытуацыі ў Данбасе. Сустрэча завяршылася безвынікова, а АБСЭ абвінаваціла ў зрыве менскіх перамоваў сэпаратыстаў, якія «нават не былі гатовыя абмяркоўваць рэалізацыю рэжыму спыненьня агню».

Дзьмітры Тымчук падкрэсьлівае, што з самага пачатку менскага працэсу, зь верасьня 2014 году, лічыў усе дамовы «фількавай граматай», за якой нічога не стаіць:

«Любыя перамовы і нейкі мірны дыялёг магчымыя толькі пры адной умове: калі Расейская Фэдэрацыя прызнае сваю адказнасьць за падзеі ў Данбасе. Тады мы будзем разумець, якія гарантыі могуць даваць бакі перамоваў. Цяпер нават падчас гэтых сарваных перамоваў пачыналіся банальныя звады: маўляў, не таго прыслалі з Кіева, патрэбен Парашэнка. Але тут пытаньне: чаму Ўкраіна павінна пасылаць нейкага сапраўды ўпаўнаважанага прадстаўніка, калі статус саміх прадстаўнікоў ДНР і ЛНР, як і статус гэтых арганізацыяў, абсалютна незразумелы? Калі ідзе размова пра нейкія гарантыі, то абодва бакі павінны прызнаваць сваю адказнасьць — і Ўкраіна, і Расея, безь якой гэтыя падзеі ня могуць адбывацца. На дадзены момант, на жаль, мы ня бачым ніякай магчымасьці вырашаць пытаньне вайны ў Данбасе ў дыпляматычным полі. Адпаведна, застаецца толькі варыянт збройнага супрацьстаяньня і сілавога вырашэньня пытаньня».

Між тым афіцыйны Кіеў раз за разам вяртаецца да менскага фармату і падкрэсьлівае неабходнасьць захаваньня менскіх дамоўленасьцяў.

Паводле слоў Тымчука, украінскі прэзыдэнт Пятро Парашэнка тым самым хоча даказаць Захаду, што Ўкраіна імкнецца ў першую чаргу мірным шляхам вырашыць канфлікт у Данбасе.

«І гэта зразумела: калі б мы рабілі стаўку на сілавое вырашэньне праблемы (што аб’ектыўна зьяўляецца адзіным выхадам), то Эўропа і ЗША наўрад ці нас бы так падтрымлівалі, як сёньня».

На думку Тымчука, сёньняшнія мэты Крамля ў Данбасе абсалютна відавочныя: максымальна пашырыць тэрыторыю, якую кантралююць баевікі ДНР і ЛНР, з наступным замарожваньнем канфлікту, як у Прыднястроўі.

Каардынатар руху «Інфармацыйны супраціў» таксама апавёў пра сытуацыю ў Дэбальцаве, дзе апошнімі днямі ідуць цяжкія баі.

Сытуацыя ў зоне баявых дзеяньняў ва Ўкраіне на 2 лютага
Сытуацыя ў зоне баявых дзеяньняў ва Ўкраіне на 2 лютага

«Паводле дадзеных на сёньняшнюю раніцу, расейска-тэрарыстычныя войскі зьмянілі тактыку дзеяньняў. Яны сутаргава спрабавалі стварыць дэбальцаўскі „кацёл“ (то бок каля гарлавіны дэбальцаўскага пляцдарма перарэзаць шляхі забесьпячэньня і атачыць нашу групоўку ў гэтым раёне), але гэтыя пляны сарваліся. Таму цяпер яны перайшлі да тактыкі выцясьненьня ўкраінскіх войскаў з раёну Дэбальцава», — паведамляе ён.

Паводле інфармацыі Тымчука, баевікі нясуць вялікія страты ў раёне Дэбальцава, але атрымліваюць падмацаваньні. На дадзены момант у раёне Дэбальцава дзейнічаюць як мінімум чатыры тактычныя групы расейска-тэрарыстычных войскаў пры падтрымцы трох артылерыйскіх групаў, кажа ён.

Пры гэтым, паводле Тымчука, штатныя падразьдзяленьні расейскіх войскаў у баях за Дэбальцава ўдзелу пакуль не бяруць:

«Мы там фіксавалі дывэрсійна-выведныя групы расейскага спэцназу. Але на дадзены момант расейскі бок прадстаўлены ў асноўным наёмнікамі, у тым ліку вайскоўцамі, якія звольненыя толькі што. Штатных падразьдзяленьняў расейскіх Узброеных сілаў мы на дадзены момант там не фіксуем».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG