Часопіс «Архэ» на паліцах гарадзенскай крамы, дзе прадаюць канфіскаваныя тавары
Часопіс «Архэ» прадаюць як канфіскат
У Горадні ў краме з канфіскаванымі тварамі зьявіліся кнігі, якія былі забраныя падчас леташняй прэзэнтацыі часопіса «Архэ», з-за якой быў затрыманы рэдактар выданьня Валер Булгакаў.
Часопісы «Архэ-Пачатак», а таксама кнігі, выдадзеныя рэакцыяй, прадаюцца па 14 900 рублёў. Побач на паліцах — абутак, цыгарэты ды іншы канфіскаваны на мяжы тавар.
Гандляры патлумачылі, што тут прадаюцца часопісы і кнігі (усяго каля 200 экзэмпляраў), якія былі канфіскаваныя ў тагачаснага галоўнага рэдактара выданьня Валера Булгакава ў Горадні 14 верасьня 2012 году. Булгакава тады затрымалі, а пазьней аштрафавалі за незаконную прадпрымальніцкую дзейнасьць.
Крама на ўскраіне гораду, пакупнікоў там мала, кажуць гарадзенцы, — сюды прыходзяць тыя, хто ведае, чаго шукае.
Прадавачка спадарыня Валянціна патлумачыла, што часопісы «Архэ-Пачатак» і кнігі, выдадзеныя рэдакцыяй, прадаюцца ў краме ўжо два месяцы. Усяго тут каля 200 асобнікаў:
«Людзі пераглядаюць часам часопісы, але купляюць рэдка. Сёньня, да прыкладу, купілі толькі адну кніжку. Няма вялікай зацікаўленасьці».
Побач на паліцах ляжаць канфіскаваныя цыгарэты, абутак, у суседніх аддзелах прадаюць будматэрыялы, гарэлку, запчасткі для машынаў, гаспадарчае начыньне, кампутары і іншае.
Калі я спрабаваў пытацца ў наведнікаў крамы — ці ведаюць яны такі часопіс, што стаіць на паліцах, то ніводзін з пакупнікоў нават пра яго ня чуў.
Крама канфіскаваных тавараў у Горадні на вуліцы Карскага, 33
Тым часам учора Дэпартамэнт фінансавых расьсьледаваньняў разблякаваў банкаўскі рахунак рэдакцыі, у завядзеньні крымінальнай справы супраць рэдакцыі адмоўлена. «Архэ» спрабуе аднавіць сваю дзейнасьць пасьля працяглага перасьледу. Былы рэдактар выданьня цяпер за мяжою.
