Станіслаў Багданкевіч: Шокавая дэвальвацыя не патрэбная
«Беларусь мае сваю валюту, якая абапіраецца на збалянсаваны зьнешнеэканамічны абарот. З улікам зьнешняй пазыкі даляр мусіць каштаваць 12 тысяч рублёў. Але шокавая дэвальвацыя беларускага рубля не патрэбная», — лічыць былы старшыня Нацыянальнага банка Беларусі.
Раманчук: Заробак будзе 200-300 даляраў, пэнсія — 100 даляраў
Дэвальвацыя неабходная. Калі зрабіць яе сёньня, то можна дэвальваваць беларускі рубель на 50 % і нейкім чынам пачаць урэгуляваньне стану.
Расейскі рубель: труба Пуціна і адцісканьні ад падлогі
Погляд мастака праграмы Радыё Свабода «Цяперашні час» на падзеньне расейскай валюты.
Павал Данейка: Дэвальвацыя беларускага рубля непазьбежная
Дзяржпрадпрыемствам нічога не дапаможа, прыватны сэктар яшчэ можна выратаваць, — лічыць генэральны дырэктар бізнэс-школы ІПМ Павал Данэйка.
iPhone 6 Plus у Расеі каштуе амаль на траціну менш, чым у Беларусі
Масавыя шоп-туры беларусаў у крызісную Расею не засталіся незаўважанымі
Заходнія банкі абмежавалі апэрацыі з расейскім рублём
Такое рашэньне прынятае на фоне самага буйнога з 1998 году падзеньня рубля.
У расейскіх абменьніках сканчаецца валюта
Падзеньне рубля на Маскоўскай біржы прывяло да панікі сярод насельніцтва. Грамадзяне скуплялі даляры па 70 рублёў і эўра па 100.
На адкрыцьці таргоў Маскоўскай біржы 17 сьнежня курс рубля падае ў межах 6 рублёў.
Курс даляра да рубля склаў 71,92. Курс эўра – 91 рубель.
Пасьля імклівага падзеньня курсу расейскага рубля да асноўных валют, калі ў сярэдзіне дня за эўра давалі беспрэцэдэнтныя 100 рублёў, а за даляр — 80 рублёў, увечары грашовая адзінка Расеі пачала пакрысе вяртаць пазыцыі.
Паводле дадзеных на 21:00 16 сьнежня, эўра адступіла да ўзроўню меней за 90 рублёў, даляр вагаецца на мяжы 70 рублёў.
У любым выпадку абвал расейскага рубля аказаўся самым значным за апошнія паўтара дзясятка гадоў. Сытуацыю на валютным рынку экспэрты характарызуюць як «панічную» і слаба кантраляваную.
Мясьніковіч запатрабаваў актывізаваць экспарт за межы Мытнага саюзу
На тле фінансавага крызісу ў Расеі, які адчувальна б’е па беларускіх экспартэрах, прэм’ер-міністар Беларусі Міхаіл Мясьніковіч заклапаціўся маштабамі зьніжэньня беларускага экспарту. Паводле яго, за студзень-кастрычнік параўнальна з заплянаваным экспартам у краіны Мытнага саюзу (Расею і Казахстан) Беларусь «асела» на 777 мільёнаў даляраў, у тым ліку па Расеі — на 739 мільёнаў
Суздальцаў: Для беларускага экспарту гэта катастрофа
Сытуацыю на расейскім валютным рынку і магчымыя наступствы расейскага крызісу для Беларусі мы папрасілі пракамэнтаваць намесьніка дэкана факультэту ўсясьветнай эканомікі і ўсясьветнай палітыкі расейскай Вышэйшай школы эканомікі Андрэя Суздальцава.
Ці адэкватная рэакцыя беларускіх уладаў на абвал расейскага рубля?
Расейская валюта працягвае падаць усьлед за зьніжэньнем нафтавых цэнаў. Чым гэта пагражае беларускай эканоміцы? Што павінны былі б рабіць беларускія ўлады ў гэтай сытуацыі? Як можна ацаніць іх рэакцыю на пагрозы з Расеі? Гэтыя пытаньні ў праграме «Экспэртыза свабоды» абмяркоўваюць фінансавы аналітык кампаніі «Альпары» Вадзім Іосуб і прафэсар Барыс Жаліба.
Успамін пра 1998 год
Дагэтуль адным з самых глыбокіх эканамічных шокаў у Расеі быў крызіс 1998 году. Са жніўня да сьнежня 1998 году курс расейскага рубля упаў з 6 да 21 рубля за даляр (у 3,5 разы). Уплыў таго крызісу не абмінуў і Беларусь, прычым аддаленае беларускае «рэха» аказалася мацней за першапачатковы расейскі імпульс: паводле Нацбанку на 31 ліпеня 1998 году курс даляру быў 37 700 беларускіх рублёў, на 31 сьнежня 1998 году – 107 000 рублёў, а за наступны 1999 год курс упаў больш чым утрая – да 320 000 рублёў за даляр на 31 сьнежня 1999 году. Такім чынам ад пачатку тагачаснага расейскага жнівеньскага крызісу да сьнежня наступнага году беларуская валюта патаньнела ў 8,4 разы.
Мы прынялі рашэньне, але ня ведаем яго наступстваў, — намесьнік старшыні Цэнтрабанку Расеі
Першы намесьнік старшыні Цэнтрабанку Расеі Сяргей Швяцоў абяцае новыя крокі для падтрыманьня расейскага рубля. Пра гэта ён заявіў, выступаючы на абмеркаваньні захадаў па разьвіцьці фінансавага рынку, паведамляе расейскае агенцтва РБК.
Эмоцыямі і спэкуляцыямі патлумачыў падзеньне рубля прэс-сакратар расейскага прэзыдэнта Ўладзімера Пуціна Дзьмітры Пяскоў.
«Сапраўды, турбулентнасьць на рынку прысутнічае, яна ў асноўным тлумачыцца эмоцыямі і спэкулятыўнымі настроямі», — сказаў Пяскоў.
- By Ігар Карней
Кіраўнік Белгазпрамбанку: Нас уратуе толькі дывэрсыфікаваная эканоміка
Старшыня праўленьня «Белгазпрамбанку» Віктар Бабарыка ў гутарцы з Радыё Свабода падзяліўся меркаваньнем, якім чынам на фінансава-эканамічныя праблемы Расеі павінна рэагаваць Беларусь:
«Канкрэтна па расейскім рублі — куды гэта ўсё прывядзе Расею, я ня ведаю, таму што там гэта вельмі складаны працэс. Да таго ж, я не жыву ў Расеі і ня ведаю дакладнай інфармацыі. Але я магу адказаць наступным чынам, што тычыцца Беларусі.
Мы павінны рэагаваць не сытуацыйна, я ўвесь час гэта падкрэсьліваю. Мы не абавязаныя рэагаваць на кожную асобна ўзятую сытуацыю. Мы мусім будаваць эканоміку, якая будзе абароненая, будзе мець сваю сыстэму стрымліваньня.
То бок, калі ў нас будзе пабудаваная эканоміка, якая валодае дывэрсыфікаванымі зьнешнімі рынкамі, усё будзе інакш. А менавіта: калі ў нас будзе ня 70% экспарту ў Расею, а, напрыклад, 30% — у Расею, 30% — у Эўропу, 30% — у Амэрыку і астатнія 10%, магчыма, у Кітай, ці наадварот — гэта ўжо як хто вырашыць, то тады мы зразумеем: адначасова ўвесь сьвет палаць ня будзе. І калі дзесьці ў вас здарыцца правал, то адпаведна, дзесьці будзе плюс.
Тут, як мне падаецца, асноўныя чаканьні павінны быць такімі, і вельмі добра, што яны раз-пораз на розных узроўнях агучваюцца — найперш, у тым кантэксьце, што мы павінны будаваць дывэрсыфікаваную эканоміку. З улікам таго, што сацыяльныя праграмы дзяржавы павінны быць збалянсаваныя пад яе магчымасьці. Калі такая мадэль будзе пабудаваная і запрацуе, то мы будзем дакладна мець квітнеючую Беларусь, таму што для гэта ў нас будзе ўсё», — кажа Віктар Бабарыка.
Кіраўнік Банку Расеі Эльвіра Набіуліна патлумачыла, што для таго каб абмежаваць актыўнасьць спэкулянтаў на валютным рынку, трэба было перайсьці да плаваючага курсу рубля і прыняць рашэньне па падвышэньню працэнтнай стаўкі. Гэта зрабіла апэрацыі спэкулянтаў больш рызыкоўнымі і зьнізіла прывабнасьць «працы на валютным рынку супраць Банку Расеі», — лічыць яна.