У Менску ўвечары ў панядзелак загінуў удзельнік акцыі пратэсту. Пра гэта паведаміла МУС Беларусі. Гэта першы афіцыйна пацьверджаны выпадак гібелі ўдзельнікі акцый пратэсту супраць прэзыдэнта Аляксандра Лукашэнкі, якія суправаджаюцца вулічнымі сутыкненьнямі.
Паводле інфармацыі МУС, каля 23.00 на вуліцы Прытыцкага адзін з пратэстоўцаў спрабаваў кінуць неўстаноўленую выбуховую прыладу ў бок спэцназаўцаў. Яна выбухнула ў руцэ, мужчына атрымаў траўмы, несумяшчальныя з жыцьцём. Паводле вэрсіі МУС, натоўп будаваў барыкады для блякаваньня руху.
Паводле БелТА, на месцы здарэньня працуе сьледча-апэратыўная група.
«Наша Ніва» піша, што дэманстрантаў у гэты час «масіравана абстрэльвалі» — раней з Прытыцкага неаднаразова паведамлялі пра выбухі сьвятлошумавых гранатаў. «Белсат» перадае, што выбухі чуваць і пасьля паведамленьня МУС.
На вуліцы Прытыцкага ў Менску вечарам 10 жніўня знаходзіцца некалькі тысяч чалавек. Міліцыя ўжывае гранаты са сьлезацечным газам супраць пратэстоўцаў каля кінатэатру «Аўрора», перадае карэспандэнт Свабоды.
Некалькі тысяч чалавек знаходзяцца ў розных месцах на тэрыторыі на скрыжаваньні Пушкіна і Прытыцкага.
Людзі спрабуюць будаваць барыкады са сьметніц і іншых падручных сродкаў. Рух транспарту на праспэкце Пушкіна заблякаваны.
Каля 22.30, перадае карэспандэнт Свабоды, міліцыя адціснула людзей на адлегласьць аднаго прыпынку, многія разышліся па дварах. Аўтамабілі аб’яжджаюць барыкады па ходніках.
Пацярпеў кіроўца аўтобуса №163, побач зь ім выбухнула граната. Аб ім клапоцяцца мэдыкі хуткай дапамогі. У машыне мэдыкаў нерухома ляжыць жанчына, апісвае падзеі перад сабой карэспандэнт Свабоды.
Шэраг выданьняў і каналаў паведамляюць пра дэманстрантаў у самых розных частках Менску — ад плошчы Якуба Коласа да Каменнай Горкі і Ўручча, шмат аўтамабільных дарог перакрытыя спэцтэхнікай.
Дапаўняецца.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
