Лінкі ўнівэрсальнага доступу

Рассельгаснагляд заявіў, што беларускія сыры могуць выклікаць рак. Што хаваецца за гэтай заявай, разважаюць беларускія эканамісты


Ілюстрацыйнае фота

Ілюстрацыйнае фота

Рассельгаснагляд заявіў, што беларускія сыры могуць выклікаць ракавыя захворваньні, таксама яны асабліва небясьпечныя пры захворваньнях сардэчна-сасудзістай і страўнікава-кішачнай сыстэм. Прычына палягае ў істотным перавышэньні дазволенай масавай долі кансэрванту Е251 у беларускіх сырах шэрагу прадпрыемстваў.

«Выкарыстаньне дабаўкі Е251 у празьмерных колькасьцях дазваляе нядобрасумленным вытворцам скарачаць вытворчы цыкль і нарошчваць аб’ёмы вырабленай прадукцыі ў шкоду яе якасьці і бясьпецы», — гаворыцца на сайце расейскага ведамства.

Пры гэтым Рассельгаснагляд заяўляе пра «сур’ёзную занепакоенасьць у сувязі з сыстэматычнымі парушэньнямі патрабаваньняў тэхнічных рэглямэнтаў беларускімі вытворцамі малочнай прадукцыі».

Як ставяцца да такіх заяваў з расейскага боку беларускія эканамісты?

Леў Марголін лічыць, што Рассельгаснагляд часта выкарыстоўваецца расейскім бокам дзеля таго, каб пры патрэбе нейкай краіне памахаць пальчыкам.

Леў Марголін

Леў Марголін

«Але цяпер мне здаецца, што ўсё ж такі дыму без агню не бывае. Якасьць абсталяваньня на беларускіх прадпрыемствах паступова пагаршаецца. А якасьць найперш харчовай прадукцыі вельмі шмат у чым залежыць ад абсталяваньня, ад кваліфікацыі людзей. Заробкі не высокія, таму высокакваліфікаваныя людзі ня хочуць там працаваць. Таму, відаць, ёсьць нейкія падставы, каб Расея рабіла такія высновы. Я ведаю выпадкі, калі ў нашай краіне людзі ад малака пакутавалі на алергію.

На прадпрыемствах ёсьць дазатар, які аўтаматычна павінен кантраляваць колькасьць розных кампанэнтаў. Але калі ён не знаходзіцца ў належным стане, то ён можа дапускаць памылкі. Ня думаю, што нехта наўмысна ўжывае большую колькасьць кансэрвантаў, каб скараціць вытворчы працэс. Найбольш верагодна, што гэта хіба абсталяваньня. Парушэньне тэхналягічных працэсаў — гэта крымінальнае злачынства, тым больш, калі гэта пагражае здароўю людзей. Таму я ня думаю, што нехта адмыслова на гэта ідзе. Прычына ў абсталяваньні.

І такіх праблем будзе ўсё больш, бо эканоміка наша, і прамысловасьць у першую чаргу, дэградуюць. Гэта бачна няўзброеным вокам».

Барыс Жаліба

Барыс Жаліба

Прафэсар Барыс Жаліба мяркуе, што у справе зь беларускімі сырамі ёсьць найперш палітыка.

«Я ня думаю, што беларускія сыры і іншая малочная прадукцыя не адпавядае патрабаваньням. Час ад часу Рассельгаснагляд робіць такія набегі на нашы прадпрыемствы. Вядома, наша малочка, нашы сыры ствараюць канкурэнцыю расейскім вытворцам. І таму праз Рассельгаснагляд абмяжоўваюць пападаньне іх на расейскі рынак. Наша прадукцыя больш танная і ня менш якасная. Гэта такая палітыка абароны сваіх вытворцаў. І шкада, што расейцы прынялі дурны закон, увялі санкцыі супраць харчоў з Захаду і зьнішчаюць прадукцыю. Гэта ў той час, калі цэны на харчы ў Расеі растуць».

Барыс Жаліба, аднак, не выключае, што прычапіцца заўсёды да нечага можна, але ж няма падставаў, каб абагульняць:

«Я паглядзеў наш экспарт, і мяне зьдзівіла, што сёньня продажы ў Расею прадукцыі нашай малочкі, сыроў большыя разы ў тры, чым продажы МАЗаў, трактароў і так далей. Таму тут галоўнае — канкурэнцыя з расейскімі вытворцамі. Таму пастаўкі абмяжоўваюць такім чынам».

Паказаць камэнтары

XS
SM
MD
LG