Што для вас свабода?
Свабода — гэта жыцьцё.
Што найбольш абмяжоўвае вашу свабоду?
Я паспытаў напоўніцу несвабоды і пасьля вызваленьня я ўжо зусім па-іншаму ўспрымаю жыцьцё. Куды хачу — туды іду.
Што для вас шчасьце?
Быць зразуметым.
Чаго вы найбольш баіцеся?
Зьняволеньня.
Які талент вы хацелі б мець?
Хацеў быць канструктарам і прагна вучыўся, каб ажыцьцявіць мару. Іншых талентаў не хацеў.
Кім з сучасьнікаў вы захапляецеся?
Паэтам Васілём Супруном, які напісаў у 49 годзе ў лягеры Інта за палярным колам:
«Што я хачу? Чаго дабіваюся прагна? За што так жыцьцём безаглядна плачу, ваш рай называючы багнай?..» Гэты верш я запомніў адразу, як толькі ён трапіў да мяне.
Што вы найбольш любіце рабіць?
Люблю чытаць.
Калі б можна было пражыць жыцьцё яшчэ раз, што б вы зьмянілі?
Маё жыцьцё — суцэльная пакута з раньняга дзяцінства. Многае хацелася б пражыць інакш ды ня дадзена.
Якую найлепшую параду вы атрымалі?
Рабі дабро і яно дабром табе вернецца. Аднойчы дабро мяне ўратавала ад галоднае сьмерці.
Які ваш улюбёны дэвіз?
Ніколі пра гэта ня думаў.
У якой палітычнай сыстэме вы хацелі б жыць?
Жыць вольна ў сваёй Беларусі.
У якой краіне вы хацелі б жыць?
У Беларусі.
У якую эпоху вы хацелі б жыць?
У якую жыву, у такой і хацеў бы.
Калі б вы сталі кіраўніком Беларусі, што б зрабілі найперш?
Ніколі я ня буду кіраўніком Беларусі.
Якія адносіны Беларусь павінна мець з Эўразьвязам?
Добрасуседзкія.
Якія адносіны Беларусь павінна мець з Расеяй?
Таксама добрасуседзкія.
Некаторыя думаюць так: «Хай дыктатура, абы свая». А Вы?
Ні сваёй, ні чужой дыктатуры я не хачу.
Калі і як у Беларусі зьменіцца ўлада?
Занадта памяркоўны наш беларускі народ, прыцярпеўся ўжо да ўсялякіх зьдзекаў улады.
Калі беларусы загавораць па-беларуску?
Калі іх вучыць будуць у школах і ўнівэрсытэтах на сваёй мове.
Што будзе, калі беларусы не загавораць па-беларуску?
Зьнікне беларуская мова і гэта будзе найвялікшая бяда для краіны.
