Сяргей Касьцян ні пра што не шкадуе
29.08.2008 21:09
Два доўгажыхары ў Палаце прадстаўнікоў, Сяргей Касьцян і Анатоль Красуцкі, зьнялі свае кандыдатуры з выбараў.
У чым прычына такога нечаканага павароту ў лёсах гэтых палітыкаў?
Анатоль Красуцкі і Сяргей Касьцян абіраліся ў склад Палаты прадстаўнікоў з 1996 году. Абодва ўваходзілі ў камісію па міжнародных справах. І яны актыўна рыхтаваліся да чарговага дэпутацкага тэрміну. Спадар Красуцкі тлумачыў, што жадае захаваць дэпутацкі мандат, каб выканаць абяцаньні выбарцам. Да прыкладу, ператварыць у “маленькі Парыж” пасёлак Трактарны.
Аднак пад час дэпутацкай дзейнасьці больш вызначыўся Сяргей Касьцян – а менавіта сваімі заявамі. Цягам 13-ці гадоў ён займаў месца ў цэнтры залі. Да прыкладу, спадар Касьцян заклікаў прыняць закон пра гвалтоўную стэрылізацыю алькаголікаў. А нядаўна заявіў, што на месцы Лукашэнкі неадкладна прызнаў бы незалежнасьць Паўднёвай Асэтыі і Абхазіі.
І раптам абодва доўгажыхары Палаты прадстаўнікоў зьнялі свае кандыдатуры. Спадар Красуцкі заявіў, што атрымаў “цікавыя прапановы, якія разглядаюцца”. А ў Палаце прадстаўнікоў ён ня хоча больш займацца рутынай. А чаму байкатуе выбары Сяргей Касьцян?
“Не, я не байкатую выбары. Я проста зьняў сваю кандыдатуру, вырашыў, што, можа, мне лепш заняцца больш славянскім рухам. І як старшыня Славянскага парлямэнцкага саюзу сканцэнтраваць сваю ўвагу менавіта на гэтым. Я гэтае рашэньне прыняў недзе тыдні два таму. Але пра гэта я маўчаў. Я спэцыяльна чакаў, каб паглядзець, хто зарэгіструецца па маёй акрузе і колькі будзе чалавек”.
Карэспандэнт: “Такая ходзіць думка, што Касьцян і Красуцкі не ўвайшлі ў афіцыйны сьпіс, падрыхтаваны ўладай?”
“Я ня ведаю, ёсьць такі сьпіс альбо не. Нічога я не магу сказаць па Красуцкаму”.
Сяргей Касьцян якраз сёньня прыехаў у адпачынак у Мазыр. Ён мяркуе, што сваю дзейнасьць будзе працягваць у Менску.
“Я так мяркую, што я буду ў Менску. З Мазыра кіраваць славянскім рухам нязручна. Я буду знаходзіцца ў Менску”.
Карэспандэнт: “Там дэпутацкая кватэра застаецца...”
“Ну ёсьць такая дамоўленасьць, што застаецца і дэпутацкая кватэра, і я буду займацца гэтай вось справай”.
Карэспандэнт: “Вы ні пра што не шкадуеце, сыходзячы з Палаты прадстаўнікоў?”
“Не, ні пра што не шкадую”.
Былы дэпутат Палаты прадстаўнікоў і палітвязень Сяргей Скрабец так пракамэнтаваў сыход Касьцяна і Красуцкага:
“У тым, што яны зьняліся, тут толькі адна прычына. Загад ім быў такі, вось яны і зьняліся. Там ідуць іншыя людзі, узгодненыя па сьпісу Лукашэнкі. У нас усё па ўказцы тым людзям, якія ідуць ад улады. Што ў нас, няма працы для такіх людзей?! Навошта ў парлямэнце такія патрэбны – іншыя, такія ж самыя прыйдуць. Толькі сядзець і ціскаць кнопку “за”, там больш нічога рабіць і ня трэба”.