Лінкі ўнівэрсальнага доступу

Паводле сацыялягічных апытаньняў, большасьць расейцаў ня верыць, што прэзыдэнцкія выбары будуць сумленнымі, аднак тры чвэрці апытаных кажуць, што будуць галасаваць, і многія чакаюць, што ў выніку выбараў іх жыцьцё палепшыцца.


Апытаньне было праведзена ў студзені на замову нашага радыё расейскім аналітычным цэнтрам Юрыя Лявады ў супрацоўніцтве з кампаніяй InterMedia Survey Institute. Было апытана 1600 чалавек у 45 расейскіх рэгіёнах.

Вынікі выглядаюць парадаксальна: 45% апытаных выказваюць сумневы ў тым, што выбары пройдуць сумленна, 65% мяркуюць, што адказ на пытаньне, хто будзе наступным прэзыдэнтам, залежыць ад Уладзімера Пуціна і ягонай адміністрацыі, і толькі 19% мяркуюць, што гэта будзе залежаць ад волі выбаршчыкаў. І разам з тым тры чвэрці апытаных кажуць, што пойдуць галасаваць, пры гэтым 45% апытаных чакаюць ад прэзыдэнцкіх выбараў лепшага жыцьця для сябе і сваёй сям’і і прыкладна столькі ж – падвышэньня пэнсіяў і заробкаў.

Чаму ж людзі гатовыя ісьці на выбары, калі, паводле іх меркаваньня, яны ня будуць сумленнымі і ад іх голасу нічога не залежыць?

Сваё тлумачэньне гэтых дзіўных асаблівасьцьяў расейскай масавай сьвядомасьці прапануе экспэрт маскоўскага цэнтру Карнэгі Мікалай Пятроў:

“У цяперашняй сытуацыі негалоснай дамовы, калі людзі атрымалі пэўную асабістую свабоду і пэўны рост узроўню жыцьця, яны лічаць, што хай астатняе ўлада робіць так, як яна хоча, і не асабліва ўмешваюцца ў тыя рашэньні, якія ўлада праводзіць у галіне ўнутранай палітыкі. Вось у гэтай сытуацыі асаблівай увагі да таго, наколькі сумленна праводзяцца выбары, ў людзей няма”.

Сацыёляг цэнтру Лявады Барыс Дубін зьвяртае ўвагу, што чаканьні людзей наконт паляпшэньня іх жыцьця зьвязаныя з чаканьнем, што выбары нічога ня зьменяць, што пераемнік будзе працягваць курс дзейнага прэзыдэнта:

“Асноўнае, на што спадзяюцца расейцы – гэта працяг курсу Пуціна. Яны бачаць у Мядзьведзеву прадаўжальніка гэтага курсу”.

Варта адзначыць, што ў параўнаньні з апытаньнямі мінулай восені колькасьць людзей, якія мяркуюць, што выбары пройдуць сумленна, павялічылася ў 2 разы, да 37%. Таксама няшмат, але ў чым прычыны гэтага росту? На думку экспэртаў – у імклівым росьце папулярнасьці Мядзьведзева, паводле апытаньняў таго самага цэнтру Лявады, сярод тых, хто гатовы галасаваць 2 сакавіка, 82% маюць намер аддаць галасы за Мядзьведзева.

Мікалай Пятроў:

“Павялічэньне даверу да таго, што выбары будуць сумленнымі, зьвязана, апроч іншага, з тым высокім рэйтынгам, які мае цяпер Мядзьведзеў. З рацыянальных меркаваньняў Крамлю цяпер няма ніякай патрэбы фальсыфікаваць выбары, бо і бяз гэтага лёгка ў першым туры перамагае той кандыдат, якога Крэмль выставіў”.

На думку Мікалая Пятрова галасаваньне на выбарах людзі ўспрымаюць больш як дэманстрацыю ляяльнасьці, чым як сродак уплыву на палітыку:

“Я мяркую, што цяпер выбары, як і шэраг іншых інстытутаў, успрымаюцца хутчэй як рытуал, як яны ўспрымаліся ў савецкім мінулым”.



  • 16x9 Image

    Юры Дракахруст

    Журналіст. Нарадзіўся ў 1960 г. Зь 2000 г. — супрацоўнік Беларускай рэдакцыі Радыё Свабода ў Празе. Ляўрэат прэміі Беларускай асацыяцыі журналістаў (1996).
     

XS
SM
MD
LG