Дзеці, якія ніколі не хварэлі на COVID-19, могуць мець антыцелы, што абараняюць іх ад гэтай хваробы, піша The New York Times.
Новае брытанскае дасьледаваньне паказала, што пры некаторых прастудных захворваньнях могуць заставацца антыцелы супраць новага каранавірусу. Гэты, магчыма, тлумачыцца факт, што дзеці больш абароненыя, чым дарослыя.
Гэта была вялікая загадка пандэміі: чаму ў дзяцей менш шанцаў, чым у дарослых, заразіцца новым каранавірусам, а ў выпадку заражэньня — менш шанцаў захварэць?
Магчымая прычына можа заключацца ў тым, што ў многіх дзяцей ужо ёсьць антыцелы да іншых каранавірусаў, мяркуюць дасьледнікі з Інстытуту Фрэнсіса Крыка ў Лёндане.
Прыкладна кожная пятая прастуда ў дзяцей выклікаецца вірусамі з гэтай сям’і. Антыцелы да тых вірусаў таксама могуць блякаваць новы каранавірус, што выклікаў цяперашнюю пандэмію — SARS-CoV-2.
У дасьледаваньні, апублікаваным 13 лістапада ў часопісе Science, група на чале з кіраўніком лябараторыі рэтравіруснай імуналёгіі ў інстытуце Крыка Джорджам Касыётысам, паведамляе, што ў сярэднім толькі 5 працэнтаў дарослых маюць гэтыя антыцелы, а вось у дзяцей гэты адсотак дасягае 43.
Дасьледнікі, што ня ўдзельнічалі ў дасьледаваньні, былі заінтрыгаваныя гэтым адкрыцьцём. Бэнджамін Ларман, імуноляг з Мэдычнай школы Джона Гопкінса, назваў гэта «добра праведзеным дасьледаваньнем, якое стварыла пераканаўчую тэорыю, да таго ж пацьверджаную навуковымі вынікамі».
Стывен Элэдж, прафэсар генэтыкі ў Гарвардзкай мэдычнай школе, таксама згаджаецца з такой ацэнкай. Ён і яго калегі выявілі, што ў многіх людзей ёсьць антыцелы да прастуды, выкліканай іншымі каранавірусамі. У лябараторных дасьледаваньнях гэтыя антыцелы таксама блякуюць новы каранавірус.
Паводле прафэсара Элэджа, дарослыя могуць застудзіцца 1-2 разы на год, а дзеці хварэюць 10-12 разоў. У выніку ў дзяцей разьвіваюцца антыцелы да каранавірусу, якія прысутнічаюць амаль увесь час; яны могуць зьмяншаць сымптомы прастуды і нават пакінуць яе без сымптомаў, але ўсё ж заразнаю.
Пры тыповых вірусных інфэкцыях імунная сыстэма выпрацоўвае антыцелы для барацьбы зь вірусамі. Калі інфэкцыя падаўленая, колькасьць непатрэбных антыцелаў зьмяншаецца. Але ў арганізьме застаюцца так званыя клеткі памяці, якія дазваляюць хутка выпрацоўваць антыцелы, калі вірус зноў паспрабуе ўварвацца.
Чаму ж тады ў сьвеце мае месца пандэмія? — пытаецца The New York Times. — Большасьць з нас таксама павінны былі б быць абароненыя клеткамі памяці, якія пакінулі ранейшыя каранавірусы.
Цалкам магчыма, што з часам вы страціце імунную памяць, — кажа прафэсар Элэдж. Ён падазрае, што новы каранавірус можа перашкодзіць актывацыі клетак памяці, здольных рэагаваць на інфэкцыю.
Паводле яго слоў, інфэкцыя «можа выклікаць цьмяны ўспамін, які з часам зьнікае». Калі гэта так, то для абароны ад новага каранавірусу спатрэбіцца зусім сьвежае заражэньне прастудным каранавірусам, і нават тады абарона можа быць абмежаванаю ў часе.
Новы каранавірус таксама можа перашкаджаць выпрацоўцы антыцелаў, якія спэцыяльна яго атакуюць. Гэтым можа растлумачыць, чаму дзеці зь іх, здавалася б, бесьперапыннымі прастуднымі хваробамі жывуць нашмат лепш, чым дарослыя.
Доктар Элэдж кажа, што, калі ён мае рацыю ў дачыненьні да страты клетак памяці, то гэта добрая навіна для распрацоўкі вакцын. Вакцына павялічвае выпрацоўку антыцелаў без прысутнасьці вірусу. Такім чынам, вірус «не знаходзіцца на заднім пляне, парушаючы фарміраваньне клетак памяці», — кажа ён.
Іншая магчымасьць заключаецца ў тым, што большасьць дарослых насамрэч абароненыя клеткамі памяці ад папярэдніх інфэкцый, выкліканых прастудай. У невялікай колькасьці людзей ёсьць дастаткова антыцелаў у крыві, каб абараніць іх у любы момант, таму яны могуць хутка выпрацоўваць новыя антыцелы, каб зьменшыць ўзьдзеяньне новага каранавірусу.
Гэтым можна растлумачыць той факт, што многія інфікаваныя дарослыя хутка выздараўліваюць.
