Амэрыканскія Цэнтры кантролю і прафіляктыкі хваробаў (CDC) паведамілі, што вірус, які выклікае COVID-19, можа распаўсюджвацца, лётаючы ў паветры гадзінамі, піша «Голас Амэрыкі» са спасылкай на агенцтва Reuters.
Гэта азначае, што нават людзі, якія вытрымліваюць сацыяльную дыстанцыю, могуць заражацца, калі знаходзяцца ў закрытым памяшканьні, якое дрэнна праветрываецца.
Такім чынам навукоўцы прызналі асьцярогі, якія выказваліся шматлікімі экспэртамі ў галіне аховы здароўя, што вірус можа распаўсюджвацца паветрана-кропельным шляхам.
У рэкамэндацыях CDC, апублікаваных 5 кастрычніка, гаворыцца: наяўныя сьведчаньні паказваюць на тое, што людзі з COVID-19, магчыма, заражалі іншых, хто знаходзіўся на адлегласьці больш за два мэтры ў закрытых памяшканьнях з дрэннай вэнтыляцыяй.
Аэразолі больш небясьпечныя за кроплі
CDC паведамілі, што, на думку навукоўцаў, у такіх умовах канцэнтрацыя інфэкцыйных дробных кропель і часьцінак (або аэразоляў), якія вылучаюцца хворымі на COVID-19, становіцца досыць высокай для распаўсюджваньня вірусу.
Доўгі час CDC сьцьвярджалі, што вірус распаўсюджваецца праз маленькія кропелькі, якія пралятаюць у паветры і звычайна падаюць на зямлю. Гэта было пакладзена ў аснову правілаў захаваньня сацыяльнай дыстанцыі ў два мэтры.
Аэразольныя часьцінкі значна меншыя паводле памеру і могуць надоўга затрымлівацца ў паветры, як дым.
Хоць у CDC падкрэсьліваюць, што перадача празь цесныя кантакты паміж людзьмі больш распаўсюджаная, група амэрыканскіх навукоўцаў у асобным адкрытым лісьце, апублікаваным у часопісе Science ў панядзелак, папярэдзіла, што аэразолі ў паветры могуць быць галоўнай крыніцай перадачы COVID-19.
«Рэальнасьць такая, што паветрана-кропельная перадача — гэта асноўны спосаб перадачы на блізкай адлегласьці пры працяглым кантакце», — заявілі навукоўцы на прэсавай канфэрэнцыі.
У аэразолі вірусы могуць знаходзіцца ў паветры ад некалькіх сэкундаў да некалькіх гадзін, могуць перамяшчацца на адлегласьць больш за два мэтры і назапашвацца ў дрэнна вэнтыляваных памяшканьнях. Гэта можа прыводзіць да выпадкаў заражэньня вялікай колькасьці людзей, паведамілі дасьледнікі.
Усе на сьвежае паветра
Некаторыя людзі з COVID-19 вылучаюць пры дыханьні і размове тысячы аэразольных часьцінак зь вірусам і значна менш кропель. Таму навукоўцы настойваюць, што асноўную ўвагу неабходна аддаваць абароне ад перадачы вірусу паветрана-кропельным шляхам.
Яны таксама адзначылі, што органы аховы здароўя павінны праводзіць выразнае адрозьненьне паміж кроплямі, што выдзяляюцца пры кашлі і чханьні, і аэразолямі, здольнымі пераносіць вірус на вялікія адлегласьці.
У лісьце экспэртаў гаворыцца, што органы аховы здароўя павінны падкрэсьліваць важнасьць пераносу мерапрыемстваў і працаў на вольнае паветра і паляпшэньня якасьці паветра ў памяшканьнях разам з нашэньнем масак і сацыяльным дыстанцыяваньнем.
