Беларусь заняла 88-е месца з 94 у найноўшым сусьветным рэйтынгу сыстэмаў аховы здароўя (Health Care Index) за 2024 год, апублікаваным міжнароднай базай дадзеных Numbeo, якая спэцыялізуецца на ацэнцы розных аспэктаў якасьці жыцьця ў краінах сьвету.
Беларусь апынулася адзінай краінай Эўропы ў рэйтынгу з індэксам аховы здароўя меншым за 50 балаў.
Агулам у рэйтынгу 94 краіны, сярод якіх Беларусь заняла 88-е месца. На адзін радок вышэй за Беларусь разьмясьцілася Нігерыя (87 месца), ніжэй — Азэрбайджан (89-е).
Сярод краінаў-суседак Беларусі ніжэй за ўсіх у рэйтынгу Польшча — яна разьмясьцілася на 76 месцы, за ёй Украіна — на 75 месцы, Расея заняла 55 пазыцыю, Латвія — 52-ю, Літва — 16-ю.
Узначалілі рэйтынг азіяцкія краіны — Тайвань (1 месца), Паўднёвая Карэя (2) і Японія (3). У канцы рэйтынгу —Вэнэсуэла (94 месца), Банглядэш (93) і Марока (92).
Індэкс аховы здароўя, складзены Numbeo, уяўляе сабой ацэнку агульнай якасьці сыстэмы аховы здароўя, прафэсійны ўзровень лекараў і іншага мэдыцынскага пэрсаналу, якасьць мэдыцынскага абсталяваньня, кошты мэдыцынскіх паслуг і г. д. у розных краінах. Ён складаецца на аснове апытаньняў, праведзеных за апошнія 36 месяцаў сярод наведнікаў парталу Numbeo, рэзыдэнтаў адпаведных краін, а не на базе даных нацыянальных службаў статыстыкі.
Кампанія Numbeo, заснаваная ў 2009 годзе, кіруе найбуйнейшай у сьвеце анлайнавай базай дадзеных аб кошце і якасьці жыцьця ў сьвеце, якая складаецца і абнаўляецца з дапамогай яе карыстальнікаў мэтадам краўдсорсінгу.
- У Беларусі ад пачатку прэзыдэнцкай перадвыбарнай кампаніі 2020 году ў крымінальных палітычных справах асудзілі сама меней 35 мэдыкаў.
- Паводле зьвестак «Вясны», дзясяткі мэдыкаў прайшлі праз затрыманьні, суды і адміністрацыйныя арышты ў «нечалавечых умовах» у беларускіх СІЗА. Шмат каго зь іх затрымлівалі проста на працоўных месцах і судзілі за «дробнае хуліганства», «непадпарадкаваньне супрацоўнікам міліцыі», «несанкцыянаванае пікетаваньне» ці за рэпосты «экстрэмісцкіх» матэрыялаў незалежных СМІ.
- У выніку шматлікіх лекараў звальняюць за іх палітычныя перакананьні, а зь некаторымі проста не падаўжаюць кантрактаў. З гэтай прычыны ў Беларусі назіраецца недахоп мэдычных спэцыялістаў.
- У канцы студзеня 2024 году Лукашэнка зьняў Піневіча з пасады міністра аховы здароўя Беларусі і прызначыў новым міністрам экс-кіраўніка РНПЦ у Навінках Аляксандра Хаджаева. Пры Піневічы сыстэма аховы здароўя пачала функцыянаваць у атмасфэры санкцый Захаду, што прывяло да пэўных праблемаў з пастаўкамі замежных лекаў і мэдыцынскага абсталяваньня.
- 2 лютага ў Беларусі прынялі закон, згодна зь якім тэрмін адпрацоўкі пасьля ардынатуры для мэдыкаў-бюджэтнікаў павялічылі з 2 да 5 гадоў.
Форум