Лінкі ўнівэрсальнага доступу

logo-print

Магілёўская міліцыя: «Помнік ахвярам Галакосту апаганілі скінгэды»


Памятны знак. Некаторыя магілёўцы прынесьлі да яго кветкі, каб падтрымаць землякоў-габрэяў

Памятны знак. Некаторыя магілёўцы прынесьлі да яго кветкі, каб падтрымаць землякоў-габрэяў

Магілёўская міліцыя затрымала двух падазраваных у апаганьваньні памятнага знаку «Габрэям — ахвярам нацызму». Пра гэта паведамілі супрацоўнікі праваахоўных органаў тэлефанаваньнем старшыні праўленьня габрэйскай абшчыны гораду Аляксею Каплану.

«Пазванілі з Упраўленьня ўнутраных спраў і сказалі, што затрымалі двух прадстаўнікоў ультраправага руху — „скінгэдаў“. У дачыненьні яшчэ дваіх праводзяцца апэратыўныя мерапрыемствы. Са слоў міліцыянта, затрыманыя плянавалі сваю акцыю больш за месяц. Ці сапраўды затрыманыя ўчынілі акт вандалізму, разьбярэцца сьледзтва», — зазначыў Аляксей Каплан.

Затрыманыя 19-гадовы ініцыятар і яго тры непаўналетнія саўзельнікі, навучэнцы магілёўскіх каледжаў, гаворыцца ў афіцыйным паведамленьні на сайце абласнога ўпраўленьня ўнутраных спраў. Падазраваныя падтрымліваюць ультраправыя ідэі нацызму і зьяўляюцца ўдзельнікамі руху магілёўскіх скінгэдаў.

«Выбар месца і аб’екта для цынічнай выхадкі плянаваліся загадзя. Каля месяца ўдзельнікі групы вывучалі мясцовыя славутасьці і памятныя для габрэяў мясьціны. Правядзеньне „акцыі“ было прымеркавана да сьвяткаваньня шабату», — адзначае магілёўская міліцыя.

Магілёўскім міжраённым аддзелам Сьледчага камітэту распачатая крымінальная справа паводле артыкулу «Хуліганства, учыненае групай асобаў».

Аляксей Каплан адмывае ад фарбы помнік

Аляксей Каплан адмывае ад фарбы помнік

Памятны знак ахвярам Галакосту аблілі чорнай фарбай 19 лістапада. Першыя здымкі з апаганеным помнікам зьявіліся ў сацыяльных сетках пасьля 20 гадзінаў. На працягу двух дзён помнік адмылі ад фарбы.

Акт вандалізм учынілі на ўгодкі зьнішчэньня нацыстамі створанага імі ж габрэйскага гета. У 1941 годзе на працягу кастрычніка і лістапада былі расстраляныя дзесяць тысяч чалавек.

Памятны знак з высечанымі на ім далонямі магілёўскія габрэі ўсталявалі там, дзе нацысты зьбіраліся зрабіць уваход у гета. Сродкі на помнік зьбіралі грамадой. Паставілі яго ў 2008 годзе.

Праз чатыры гады, у 2012 годзе, памятны знак аблілі карычневай фарбай першы раз.

Тады зламысьнікам, паводле міліцыі, аказаўся бомж. Ён нібыта знайшоў слоік з фарбай, паставіў яго на памятны знак, каб агледзець зьмесьціва, і фарбу разьліў.

Паказаць камэнтары

XS
SM
MD
LG