Як перадае BBC, спачатку паступалі паведамленьні, што аўтобус быў абстраляны з агнястрэльнай зброі, аднак пазьней высьветлілася, што невядомыя кідалі камяні.
Два вокны аўтобуса разьбіліся, некаторыя журналісты, якія знаходзіліся ў салёне, атрымалі лёгкія парэзы.
«Пачуўся пляскат, траскучы гук. Аўтобус не спыніўся, але прытармазіў. Усе леглі на падлогу, і я таксама лёг», — распавёў фатограф інфармацыйнага агенцтва Press Association.
Да месца інцыдэнту прыбылі паліцыянты, якія суправадзілі аўтобус да прэс-цэнтру.
Як паведамляе Міжнародны алімпійскі камітэт, мясцовыя ўлады пачалі расьсьледаваньне інцыдэнту.
Перад пачаткам Алімпійскіх гульняў у Рыё гарадзкая паліцыя папярэджвала пра тое, што можа ня здолець гарантаваць грамадзкую бясьпеку турыстаў і іншых замежнікаў падчас Алімпіяды.
