Лінкі ўнівэрсальнага доступу

Маскоўскі палітоляг: «Выгада Brexit для Расеі будзе моцна перабольшвацца прапагандай»


Канстанцін Калачоў

Канстанцін Калачоў

Кіраўнік «Палітычнай экспэртнай групы», расейскі экспэрт Канстанцін Калачоў лічыць, што ў Масквы няма падстаў сьвяткаваць вынікі рэфэрэндуму ў Вялікай Брытаніі як сваю перамогу.

Такое меркаваньне ён выказаў у інтэрвію Свабодзе.

«Калі казаць пра эканамічныя наступства для Расеі, то, напрыклад, нафта пасьля брытанскага рэфэрэндуму не падаражэла, а патаньнела. Канечне, можна сьвяткаваць гэта як вялікую перамогу, але мне падаецца, што выгада вынікаў рэфэрэндуму расейскай прапагандай будзе моцна перабольшвацца, а праблемы перамяншацца. Тут (у Расеі — РС.) любы вынік рэфэрэндуму назвалі б перамогай Расеі і новым калідорам магчымасьцяў.

Праўду кажучы, тое, што нас не забівае, робіць нас мацнейшымі. Для Эўразьвязу гэта, безумоўна, сур’ёзны выклік. Магчыма, гэта прымусіць Брусэль трохі зьмяніць сваю палітыку. Але я думаю, што калі тактычна гэта аслабленьне Эўразьвязу, то стратэгічна, магчыма, гэта толькі ўзмацніць ЭЗ», — кажа ён.

Калачоў таксама зьвяртае ўвагу на тое, што сам па сябе рэфэрэндум мае хутчэй рэкамэндацыйнае значэньне: працэдура выхаду яшчэ не запушчана, і ніхто ня ведае, як далей будуць разьвівацца падзеі. Але ў любым выпадку, на думку Калачова, вынікі рэфэрэндуму ў Вялікай Брытаніі істотна не паўплываюць на адносіны Расеі і Захаду.

«Калі нехта кажа, што выхад Вялікай Брытаніі з ЭЗ ці перамога Трампа ў ЗША — гэта тое, што трэба Расеі, то ён павінен неяк даказаць, што гэта так. А ніякіх доказаў гэтага я пакуль ня бачу», — кажа экспэрт.

XS
SM
MD
LG