Як паведамляе РБК, дакумэнт аб пашырэньні санкцыяў супраць Расеі быў прыняты МЗС Канады 16 сакавіка, аднак набыў моц 18 сакавіка, пасьля рэгістрацыі і публікацыі ва ўрадавым выданьні. Пэрсанальныя санкцыі ўведзеныя супраць двух чалавек — намесьніка генэральнага дырэктара па камэрцыйных пытаньнях канцэрну «Калашнікаў» Эдуарда Іофе, а таксама топ-мэнэджэра гэтага канцэрну Аляксандра Амельчанка.
У сьпіс арганізацыяў, на якія распаўсюджваюцца канадзкія санкцыі, унесеныя структуры, якія ўваходзяць у групу СМП банка: «Інвэстыцыйны рэспубліканскі банк», «Масаблбанк», ААТ «Валгаграднафтамаш», «Іжэўскі мэханічны завод», ААТ «Іжмаш».
Таксама пад санкцыі трапілі арганізацыі, зьвязаныя зь дзяржаўнай карпарацыяй «Ростэх»: зьнешнегандлёвае аб’яднаньне «Тэхнапрамэкспарт», холдынг «Тэхнадынаміка», «Тэхмаш», а таксама «Расейская электроніка» і холдынг «Швабэ».
Большасьць гэтых кампаніяў ужо знаходзіліся пад амэрыканскімі санкцыямі са сьнежня мінулага году.