У нядзелю дзяржсакратар ЗША Джон Керы абвясьціў пра дасягненьне «папярэдняга пагадненьня» з Расеяй пра спыненьне агню ў грамадзянскай вайне ў Сырыі, якая працягваецца ўжо пяць гадоў.
Пра гэта паведамляе служба навінаў «Голасу Амэрыкі».
Амэрыканскім і расейскім дыпляматам цяпер неабходна пераканаць сваіх хаўрусьнікаў у Сырыі падтрымаць пагадненьне. Масква надае ваенную падтрымку войскам прэзыдэнта Башара Асада, які зьяўляецца даўнім супернікам ЗША.
Выступаючы ў Ярданіі, Керы дапусьціў, што сутыкненьні паміж сырыйскай арміяй і апазыцыйнымі групоўкамі могуць спыніцца ўжо празь некалькі гадзінаў.
З больш стрыманай заявай выступіў расейскі МЗС. Зьнешнепалітычнае ведамства Расеі паведаміла пра тэлефонную размову паміж Джонам Керы і Сяргеем Лаўровым. Паведамляецца, што падчас размовы абмяркоўваліся ўмовы спыненьня баявых дзеяньняў у Сырыі.
Ні Керы, ні Лаўроў не паведамілі дэталяў папярэдняга пагадненьня.
Нягледзячы на нядзельную заяву дзяржсакратара Джона Керы пра дасягненьне папярэдняга пагадненьня з Расеяй пра спыненьне агню, у краіне працягваюцца акты гвалту. Ахвярамі двух нападаў, якія адбыліся незалежна адзін ад аднаго, сталі дзясяткі людзей.
Паводле папярэдніх ацэнак, два выбухі ў Хомсе, што прагрымелі ў нядзелю, прывялі да гібелі 60 чалавек. Пазьней у той жа дзень сэрыя нападаў адбылася ў прыгарадзе Дамаска Сайеда-Зэйнаб.
Пра апошнія выбухі паступіла мала інфармацыі. Маніторынгавая арганізацыя Syrian Observatory for Human Rights паведамляе пра чатыры выбухі. Зьвязаны з «Хезбала» тэлеканал «Аль-Манар» паведаміў, што ў выніку выбухаў загінулі прынамсі 22 чалавекі.
У канцы студзеня ў выніку выбухаў у шыіцкай сьвятыні ў тым жа раёне загінула ня менш за 60 чалавек.