Адпаведную просьбу прапісалі ў пратаколе па выніках пасяджэньня міжурадавай камісіі Ўкраіны і Беларусі па гандлёва-эканамічным супрацоўніцтве.
Пра гэта паведаміў начальнік упраўленьня эўрапейскай інтэграцыі Мінэнэргавугалю Ўкраіны Міхаіл Бно-Айрыян у Twitter, піша УНН.
Так, паводле ягоных слоў, Украіна і Беларусь падпісалі пратакол па выніках дваццаць трэцяга пасяджэньня ўкраінска-беларускай зьмяшанай камісіі па гандлёва-эканамічным супрацоўніцтве.
«Запісалі ў пратаколе наша жаданьне ажыцьцяўляць транзыт па тэрыторыі Беларусі прыбалтыйскага газу. Гаворка ідзе пра ЗПГ (звадкаваны прыродны газ. — РС) з Клайпеды», — паведаміў ён.
Пры гэтым Бно-Айрыян адзначыў, што гэтае пытаньне вельмі складанае, бо газатранспартная сыстэма Беларусі належыць «Газпрому». «Але ўсё ж зьвярнуліся да беларускіх сяброў з просьбай вывучыць такую магчымасьць», — дадаў ён.