Лінкі ўнівэрсальнага доступу

Незалежных журналістаў з Глыбокага дапыталі ў міліцыі і рыхтуюць справы ў суд


Тацяна Смоткіна

Тацяна Смоткіна

Сябраў БАЖ Тацяну Смоткіну і Зьмітра Лупача вінавацяць у супрацы з замежнымі СМІ без акрэдытацыі.

25 чэрвеня журналістаў апыталі ў Глыбоцкім райаддзеле міліцыі. Позву ў міліцыю давялося патрабаваць, апавяла Тацяна Смоткіна:

«Учора да мяне дахаты прыйшоў міліцыянт, назваўся ўчастковым інспэктарам. Сказаў, што ў іх ёсьць зьвесткі, нібыта я, ня маючы адпаведных дакумэнтаў, разьмяшчаю нешта на інтэрнэт-сайтах. І што з гэтае нагоды мушу зьявіцца ў міліцыю. Я сказала, што бяз позвы не пайду, і супрацоўнік міліцыі выпісаў яе проста ў мяне дома. А сёньня старшы інспэктар аддзелу аховы правапарадку і прафіляктыкі Глыбоцкага РАУС Вячаслаў Барыла паведаміў мне, што да іх прыйшла папера з раённай пракуратуры, датаваная 11 чэрвеня. Там пазначана, што, на думку пракурораў, я парушыла заканадаўства аб СМІ, і паводле артыкула 22.9 ч.2 КаАП (незаконны выраб і распаўсюд прадукцыі СМІ) мяне будуць судзіць».

Дату суду Тацяне Смоткінай пакуль не назвалі. Міліцыянт заявіў, што бракуе дакумэнтаў для яе справы, і таму ён чакае пісьмовага пацьверджаньня, што журналістка не акрэдытаваная. Тацяна Смоткіна мае зьявіцца ў міліцыю ў наступны панядзелак — каб працягнуць размову са старшым інспэктарам Барылам і каб склалі пратакол пра правапарушэньне.

«Спадар Барыла нават прызнаўся, што ўзор, якія дакумэнты трэба зьбіраць і як складаць, ім даслалі «зьверху» — у якасьці прыкладу загадана выкарыстоўваць справу берасьцейскай журналісткі Аліны Літвінчук», — дадала Тацяна Смоткіна.

Глыбоцкую журналістку вінавацяць у парушэньні адміністрацыйнага заканадаўства за матэрыял «Дарогі ў Глыбокім стануць пазытыўнымі», разьмешчаны 9 чэрвеня на сайце Радыё Рацыя. У тэксьце вялося пра тое, што навучэнцы Глыбоцкай мастацкай школы імя Язэпа Драздовіча размалявалі каналізацыйныя люкі. Быў у матэрыяле і камэнтар галоўнага спэцыяліста аддзелу ідэалягічнай працы, культуры і па справах моладзі Глыбоцкага райвыканкаму Тацяны Працук, якая сказала, што «гэта адзін з тых праектаў, які робіць наш горад яшчэ больш прывабным».

Гутарка ў міліцыі з журналістам Зьмітром Лупачам тычылася матэрыялу «Знайшліся сваякі памежніка, які загінуў на Глыбоччыне 17 верасьня 1939 года», разьмешчаным на сайце «Эўрарадыё».

Зьміцер Лупач

Зьміцер Лупач

«Інспэктар Вячаслаў Барыла паказаў мне раздрукоўку гэтага матэрыялу з сайта, дзе выстаўлены тэкст без пазначэньня аўтарства, а таксама ксэракопію з газэты „Вольнае Глыбокае“, дзе пад артыкулам стаіць маё прозьвішча. Паводле міліцыянта, аўтарства артыкула ў газэце — гэта доказ таго, што я супрацоўнічаю і з замежным СМІ. Спадар Барыла паведаміў, што даслаў запыт, ці маю я акрэдытацыю як журналіст „Эўрарадыё“, і цяпер чакае адмоўнага адказу», — апавёў Зьміцер Лупач.

Яго таксама выклікаюць у міліцыю ў наступны панядзелак, каб скласьці пратакол правапарушэньня і скончыць падрыхтоўку справы для суду. Паводле часткі 2 артыкула 22.9 ч.2 КаАП (незаконны выраб і распаўсюд прадукцыі СМІ) журналістам пагражаюць штрафы памерам ад 20 да 50 базавых велічынь.

XS
SM
MD
LG