Лінкі ўнівэрсальнага доступу

3 гады за праслухоўваньне супрацоўнікаў


Тацяна Селіх

Тацяна Селіх

Суд пакараў былую дырэктарку менскай «Слодычы».

Суд Першамайскага раёну Менску засудзіў былую дырэктарку кандытарскай фабрыкі «Слодыч» Тацяну Селіх за праслухоўваньне супрацоўнікаў кампаніі.

Яна пакараная 3 гадамі зьняволеньня ў калёніі агульнага рэжыму без канфіскацыі маёмасьці. Селіх заявіла, што не прызнае сябе вінаватай і будзе абскарджваць вырак.

Упраўленьне Сьледчага камітэту па Менску ўстанавіла, што дырэктарка фабрыкі распарадзілася набыць за кошт прадпрыемства ў камэрцыйнай фірмы спэцыяльнае абсталяваньне для падслухоўваньня ды гуказапісу і ўсталяваць яго ў службовых памяшканьнях. Пры гэтым уся інфармацыя пра размовы супрацоўнікаў акумулявалася на кампутары кіраўніка, а гэта парушэньне таямніцы тэлефонных і іншых перамоў.

Былой дырэктарцы прад’явілі абвінавачаньне па шэрагу артыкулаў Крымінальнага кодэксу. Дзеяньні службовай асобы кваліфікаваныя як арганізацыя незаконнага вырабу і збыту спэцыяльных тэхнічных сродкаў, прызначаных для сакрэтнага атрыманьня інфармацыі і злоўжываньня службовым становішчам у асабістых інтарэсах, што нанесла прадпрыемству шкоду ў асабліва буйным памеры.

Абвінавачаная адмовілася ад супрацоўніцтва з органам крымінальнага перасьледу, спрабавала перашкаджаць дзеяньням сьледчых і не прызнала сваёй віны ў інкрымінаваных ёй злачынствах.

Былую дырэктарку фабрыкі «Слодыч» затрымалі ў сярэдзіне сьнежня 2013 году.
XS
SM
MD
LG