Лінкі ўнівэрсальнага доступу

Дырэктарку фабрыкі «Слодыч» затрымалі за праслухоўваньне падначаленых


Кайданкі, ілюстрацыйнае фота

Кайданкі, ілюстрацыйнае фота

Дырэктарку кандытарскай фабрыкі «Слодыч» Тацяну Селіх затрымалі за незаконнае праслухоўваньне сваіх падначаленых. Супраць яе распачата крымінальная справа.

Дырэктарка цяпер знаходзіцца ў сьледчым ізалятары, аднак абвінавачваньне ёй пакуль не прад'явілі.

У выніку праверкі, праведзенай пракуратурай Менску, высьветлілася, што дырэктарка фабрыкі загадала набыць за кошт прадпрыемства спэцабсталяваньне для праслухоўваньня і гуказапісу і ўсталяваць яго ў службовых памяшканьнях.

Упраўленьнем Сьледчага камітэту па Менску дзеяньні дырэктаркі «Слодычы» расцэненыя як злоўжываньне службовымі паўнамоцтвамі ў асабістых інтарэсах, з нанясеньнем прадпрыемству шкоды ў асабліва буйным памеры (больш за Br 202 млн.), перадае Інтэрфакс.

«Таксама дырэктаркай нанесена шкода правам і законным інтарэсам грамадзянаў шляхам парушэньня таямніцы тэлефонных перамоваў і іншых спосабаў зносін, з выкарыстаньнем спэцсродкаў, у парушэньне дзейнага заканадаўства», — паведаміў афіцыйны прадстаўнік УСК па Менску Аляксандар Герасімаў.

На «Слодычы» пакуль сытуацыю не камэнтуюць.

Як патлумачыў карэспандэнту Свабоды Аляксандар Герасімаў, грошы былі пералічаныя і абсталяваньне на фабрыку было пастаўлена. Ён аднак не назваў беларускую фірму, якая паставіла гэтае абсталяваньне для праслухоўваньня і запісу размоваў.

«Гэтая фірма шэраг працаў і заказаў выконвала ў асноўным заўсёды правільна, не парушаючы закон. Але ў гэтым выпадку для пастаўкі і ўстаноўкі такога абсталяваньня ў фірмы павінна была быць ліцэнзія.А на той момант у фірмы ліцэнзіі не было».

Кандытарская фабрыка «Слодыч» уваходзіць у дзяржаўны канцэрн «Белдзяржхарчпрам».

Паказаць камэнтары

XS
SM
MD
LG