Вайна ў Кіеве. Дзень другі

У шпіталях ня менш за 270 параненых

Колькасьць пацярпелых падчас беспарадкаў у Кіеве з аўторка складае каля 800 чалавек, зь іх прыкладна палова – супрацоўнікі праваахоўных органаў.

Пра гэта заявіў у сераду намесьнік начальніка Галоўнага сьледчага ўпраўленьня МУС Украіны Алег Татараў. Паводле яго, зь цялеснымі пашкоджаньнямі рознай ступені цяжкасьці шпіталізаваныя 350 чалавек – цывільныя асобы і супрацоўнікі сілавых структур. Дэпартамэнт аховы здароўя Кіеўскай адміністрацыі паведаміў ўвечары ў сераду, што колькасьць загінулых на дадзены момант – 26 , на лячэньні ў шпіталях знаходзяцца больш за 270 пацярпелых, у тым ліку з агнястрэльнымі раненьнямі.

Януковіч зьмяніў камандуючага ўзброенымі сіламі Ўкраіны

Прэзыдэнт Украіны Віктар Януковіч вызваліў ад пасады начальніка Генштаба, галоўнакамандуючага ўзброенымі сіламі генэрал-палкоўніка Ўладзімера Заману.

Як паведамляецца на сайце прэзыдэнта Ўкраіны, новым кіраўніком Генштаба і камандуючым УС стаў адмірал Юры Ільін, які да гэтага ўзначальваў ВМС Украіны.

У Хмяльніцкім штурмуюць Савет бясьпекі

У Хмяльніцкім пачаўся штурм абласнога ўпраўленьня Савета бясьпекі Ўкраіны.

Пратэстоўцы кідаюць «кактэйлі Молатава» ў вокны другога і трэцяга паверхаў памяшканьня.

Супрацоўнікі СБУ з вышэйшых паверхаў спрабуюць іх патушыць, аднак гэта ім не ўдаецца.

Таксама гарыць цэнтральны ўваход у памяшканьне. Актывісты запалілі шыны ля будынка, паведамляе УНІАН.

Крыху раней у Хмяльніцкім кіраўніцтва абласной СБУ ўзяло на сябе адказнасьць за агнястрэльныя раненьні, нанесеныя актывістам днём падчас мітынгу каля СБУ, паведаміў дэпутат Хмяльніцкага гарсавета Аляксандар Сімчышын, які быў на перамовах з кіраўніцтвам СБУ.

Паводле яго слоў, там заявілі, што гатовыя аплаціць лячэньне пацярпелых.

У Хмяльніцкім мітынгоўцы 19 лютага захапілі будынак абласной дзяржаўнай адміністрацыі, а таксама аблажылі абласную пракуратуру.

Пры спробе мітынгоўцаў трапіць у памяшканьне абласнога СБУ двое мужчын і жанчына атрымалі раненьні. Жанчына знаходзіцца ў рэанімацыі.

Дэпутат: У Доме прафсаюзаў маглі загінуць людзі

У Доме прафсаюзаў з-за пажару мінулай ноччу маглі загінуць дзясяткі людзей.

Пра гэта «Ўкраінскай праўдзе» паведаміў дэпутат ад «Бацькаўшчыны» Сяргей Собалеў:

«У нас на першым паверсе быў шпіталь, дзе ляжала каля ста чалавек , якія былі ў вельмі цяжкім стане. І гэта пацьвердзяць нашы мэдыкі. Цяпер там наогул кагосьці знайсьці немагчыма».

«Мы не маглі нікога вывесьці, бо будынак гарэў з першага і зь дзявятага паверхаў адначасова. Гэта значыць, апошні і першы паверхі былі падпаленыя фактычна спэцназам „Бэркута“ адначасова, таму мы ня можам ні даведацца, ні знайсьці», — растлумачыў дэпутат.

Ён адзначыў: вядома, з дома выводзілі людзей, «спрабавалі нешта рабіць, людзі выскоквалі, хто як мог і ў чым быў».

«Дом знаходзіцца ў жудасным стане, у ім прагарэлі і абрушаныя паверхі, дзе нельга нічога знайсьці ўвогуле. Дык вось факт эвакуацыі людзей ня можа цяпер пацьвердзіць ніводзін чалавек, бо гэтае ўзгараньне адбылося адначасова зь першага і апошняга паверха» , — адзначыў ён.

У сваю чаргу МНС заявіла, што яны эвакуявалі 41 чалавека з Дома прафсаюзаў, а «на дасьледаванай тэрыторыі будынка пацярпелых і ахвяраў няма».

«Мінсктранс» паведаміў, што ад 19 лютага аўтобусы па маршруце «Менск—Кіеў» часова будуць даяжджаць толькі да Чарнігава. Прычына скарачэньня маршруту на афіцыйным сайце «Мінсктранса» не паведамляецца.

СБУ ўдакладняе, што апэрацыя яшчэ рыхтуецца

Рада бясьпекі Ўкраіны толькі рыхтуе антытэрарыстычную апэрацыю па ўсёй краіне, а не прыступіла да яе рэалізацыі.

Такое ўдакладненьне распаўсюдзіла прэс-служба СБУ, паведамляе Інтэрфакс.

У апэрацыі могуць узяць удзел вайскоўцы

Міністэрства абароны Ўкраіны заяўляе, што вайскоўцы Ўзброеных сіл могуць узяць удзел у антытэрарыстычных апэрацыях у краіне.

Пра гэта гаворыцца ў паведамленьні, якое міністэрства распаўсюдзіла ўвечары.

У ведамстве адзначылі, што ў раёне правядзеньня антытэрарыстычнай апэрацыі вайскоўцы маюць права:

— ужываць зброю і спэцсродкі;

— затрымліваць і дастаўляць у органы ўнутраных спраў асобаў, якія ўчынілі або ўчыняюць правапарушэньні ці іншыя дзеяньні;

— правяраць у грамадзян і службовых асоб дакумэнты, а ў выпадку адсутнасьці — затрымліваць іх для высьвятленьня асобы;

— ажыцьцяўляць у раёне апэрацыі асабісты агляд грамадзян, рэчаў і транспартных сродкаў;

— часова абмяжоўваць або забараняць рух транспартных сродкаў і пешаходаў на вуліцах і дарогах.

У Харкаве «Беркут» і «цітушкі» разагналі актывістаў, якія спрабавалі заблякаваць выезд курсантаў унутраных войскаў у Кіеў.

Прэзыдэнт Польшчы заклікаў Януковіча спыніць гвалт

Браніслаў Камароўскі правёў тэлефонную гутарку зь Віктарам Януковічам. Пра гэта Польскаму радыё паведаміў міністар у Канцылярыі польскага лідэра Ярамір Сакалоўскі.

У прыватнасьці Камароўскі заклікаў Януковіча вярнуцца да перамоў з апазыцыяй без папярэдніх умоў.

Януковіч у адказ апавёў пра свой «сцэнар палітычнага вырашэньня крызісу».

Цяпер у Кіеў накіроўваецца міністар замежных спраў Польшчы Радаслаў Сікорскі. Чакаецца, што заўтра ў Брусэлі будуць разглядаць пытаньне санкцый да вінаватых ва ўжываньні сілы супраць апазыцыі.

Апазыцыя кліча ўсіх на Майдан

Штаб нацыянальнага супраціву паведаміў, што а 19 гадзіне (па кіеўскім часе) адбудзецца інфармацыйны мітынг.

«Да ўдзелу запрашаюцца ўсе неабыякавыя кіяўляне, якіх турбуе лёс Украіны і сталіцы. Просьба да ўсіх максымальна мабілізавацца і прыходзіць на акцыю. Разам — мы сіла!», — гаворыцца ў паведамленьні на сайце «Бацькаўшчыны».

У Ужгарадзе мітынгоўцы занялі адміністрацыю

Каля тысячы пратэстоўцаў занялі будынак Закарпацкай абласной дзяржаўнай адміністрацыі.
Міліцыянты, якія знаходзіліся ў будынку, былі вымушаныя проста пакінуць памяшканьне.З кабінэта губэрнатара людзі вынесьлі партрэт Януковіча.Актывісты зносяць лавы з плошчы, каб выкарыстаць іх у барыкадах.

Гэта вайна людзей супраць улады, — украінскі праваабаронца

Амбасадар Пает: ЗША ўжо скасавалі візы некаторым украінскім чыноўнікам

СБУ пачынае антытэрарыстычную апэрацыю

Апазыцыя патрабуе ад Януковіча поўнага замірэньня

У Луцку кіраўніка абласной адміністрацыі Валыні Аляксандра Башкаленку прыкавалі наручнікамі на сцэне Эўрамайдану, патрабуючы, каб ён пакінуў пасаду.

Мэркель хоча абмеркаваць санкцыі

Канцлер Нямеччыны Ангела Мэркель назвала падзеі ва Ўкраіне «шакуючымі».

«Эўропа павінна абмеркаваць адрасныя санкцыі адносна вінаватых асобаў», — гаворыцца на старонцы Міністэрства замежных спраў Нямеччыны ў Twitter’ы.

Падчас сустрэчы ў Парыжы прэзыдэнт Францыі Франсуа Алянд і канцлер Ангела Мэркель назвалі падзеі ва Ўкраіне «агіднымі і непрымальнымі», паведамляе Інтэрфакс.

Яны выказалі надзею, што 20 лютага кіраўнікі МЗС краін ЭЗ увядуць санкцыі ў дачыненьні да адказных за гвалт ва Ўкраіне.

Колькасьць загінулых павялічылася да 26

У Міністэрстве аховы здароўя Ўкраіны пацьвердзілі гібель 26 чалавек.

Пра гэта заявіла выканальніца абавязкаў міністра аховы здароўя Ўкраіны Раіса Багатырова, гаворыцца ў афіцыйным паведамленьні міністэрства.

Колькасьць загінулых у Кіеве 18 лютага павялічылася да 26, зь іх 10 — супрацоўнікі Міністэрства ўнутраных спраў, астатнія — удзельнікі падзеяў, якія адбыліся ў цэнтры Кіева, паведаміла Багатырова.

«Абсалютная большасьць людзей загінулі ад агнястрэльных цяжкіх раненьняў», — адзначыла чыноўніца.

Магілёўскія ўкраінцы: «Трэба маліцца за Ўкраіну»

Магілёўскія ўкраінцы лічаць, што на іхнай гістарычнай радзіме разьвіцьцё падзеяў пайшло па найгоршым са сцэнароў. Некаторыя заяўляюць, што ва Ўкраіне пачалася грамадзянская вайна і хуткага міру ня будзе. Некаторыя ж трымаюцца думкі, што вайны няма, але супрацьстаяньне перастае ў збройны канфлікт, які можна яшчэ залагодзіць палітычнымі захадамі.

Клічко: Януковічу пара сыходзіць

Улада Віктара Януковіча павінна сысьці, бо толькі прэзыдэнт адказвае за забойствы і тэрор супраць мірных грамадзян. Пра гэта ў відэазвароце да ўкраінцаў заявіў лідэр партыі «Удар» Віталь Клічко.