Лінкі ўнівэрсальнага доступу

logo-print

Спачатку — пратэсты, потым — заробкі 14-17 мільёнаў


Кіроўцам самазвалаў на «Граніце» значна падвысілі заробкі. Кіраўнік суполкі незалежнага прафсаюзу Алег Стахаевіч перакананы, што гэта — вынік рабочага пратэсту.


Васіль, кіроўца самазвалу на «Граніце», кажа, што зарабіў за месяц 15 мільёнаў. Аднак, заўважае ён, у гэтым падвышэньні заробку ёсьць і свае нюансы, бо плаціць зараз сталі за колькасьць перавезенага каменю:

«Я атрымліваў 7-8, а за гэты месяц мне налічылі каля 15 мільёнаў. Аднак, тут як — хто возіць, той атрымоўвае. Раней нам за рамонт плацілі лепш — прэмію давалі. Хлопцы, што толькі ўладкаваліся і на старэнькіх „БелАЗах“ працуюць, паатрымоўвалі толькі па 5-6 мільёнаў. А як яны рэйс той зробяць, калі ў іх „БелАЗ“ выпрацаваў свой рэсурс?»

Рабочы кажа, што кіроўцы самазвалаў, якія перавезьлі шмат каменю, зарабілі па 14-17 мільёнаў.

Васіль упэўнены, што рост заробку на прадпрыемстве адбываецца найперш у выніку пратэсту працоўных:

«Гэта на 300 працэнтаў адыграла… Ведаеце, як яны баяцца зараз гэтага незалежнага прафсаюзу? Як агню! Пажартавалі былі хлопцы, што трэба па новаму выходзіць з прафсаюзу, бо нешта там ім не спадабалася. Толькі сказалі між сабой — ужо начальства ведае і бяжыць да нас. Маўляў, што ў вас такое, мы вам усё зробім!»

Алег Стахаевіч

Алег Стахаевіч

Кіраўнік суполкі незалежнага прафсаюзу на «Граніце» Алег Стахаевіч таксама пагаджаецца з думкай, што пратэст змусіў падвышаць заробкі:

«На сьнежань 2011 году заробак „БелАЗістаў“ быў 2 мільёны 700 тысяч — 3 мільёны 500 тысяч рублёў. Зараз мы прыйшлі да тых вынікаў, якія хацелі б мець, я думаю, на ўсіх прадпрыемствах Беларусі.»

Алег Стахаевіч кажа, што з ростам аплаты працы дасягнутая адна з мэтаў пратэсту. Аднак, ён мае засьцярогі, што ў выпадку поўнага зьнішчэньня працоўнага руху сытуацыя з памерам заробку можа зьмяніцца.

Напрыканцы 2011 году некалькі соцень працаўнікоў прадпрыемства па здабычы будаўнічага каменю «Граніт» у Мікашэвічах напісалі заявы, што выходзяць з афіцыйнага прафсаюзу. Такім чынам быў выказаны пратэст супраць нізкіх, на іх думку, заробкаў, грэблівых адносінаў з боку начальства і бязьдзейнасьці прафсаюзу. Працоўныя абвясьцілі, што ствараюць на прадпрыемстве суполку Беларускага незалежнага прафсаюзу. Адразу пасьля гэтага сябры незалежнага прафсаюзу адчулі ціск з боку адміністрацыі.
XS
SM
MD
LG