Лінкі ўнівэрсальнага доступу

Трыюмф волевыяўленьня


Канстанцін Чарнец

Кідаючы ў ваду каменьчыкі, глядзі на кругі, імі ўтвораныя; інакш гэткае кіданьне будзе пустою забаваю.


Казьма Пруткоў, Думкі й афарызмы


Ну, пачалося! Сэзонныя алергіі, сэзонныя закаханьні. Покаўкі папукаліся, выбарчыя ўчасткі парасчынялі дзьверы насустрач усім, хто прагне дачаснага датэрміновага волевыяўленьня. Нагода маленькая, нават амаль бязважкая, але трошкі скалыхнулася кволая паверхня жыцьцёвага вадасховішча і птушкі заварушыліся ў чароце.

Ёсьць, ёсьць зацікаўленыя ў палітыцы людзі; яны за ўсімі падзеямі сочаць, нават тэрміны адпаведныя трымаюць у апэратыўнай памяці. Але не дачакаюцца іх гасьцінна адчыненыя дзьверы выбарчых участкаў. Ані датэрмінова, ані ў спэцыяльна адведзены пад волевыяўленьне дзень. Бо ня суджана. Са зьмяшанымі пачуцьцямі піша пра гэта bihi-puuk:


І гэтым разам не пападаю на выбары. І не хачу пападаць. Не, я не палітычна індыфэрэнтная асоба, проста лянота некуды цягацца, глядзець на ўсе тамашнія прыколы. Тым больш што кандыдаты на ўчастку — спрэс "кловуны" дый толькі. І з бадуна пасьля першай суботы ў дваццаць чатыры нязручна будзе галачку ставіць дзе патрэбна, яшчэ прамахнуся, ня дай божа ;)




А маці сказала, што ў такім выпадку сама за мяне прагаласуе. Вось і паглядзім, ці зловіць хто такое парушэньне...


Неангажаваныя лаўцы парушэньняў сёньня трошкі патаўкліся на форуме тут.баю, дзе яны намагаліся канчаткова ўстанавіць, дзе ж насамрэч будуць фальсыфікавацца вынікі выбараў — на выбарчых участках ці ў акружных камісіях? Адны даводзяць, нібы ўсё, што трэба, малююць на месцы, бо пасьля галасаваньня на ўчастках вывешваюць вынікі — кожны неабыякавы маладзён адказны грамадзянін будзе мець магчымасьць скласьці сумы па ўчастках і пераканацца. У чым-небудзь. Іншыя ўпэўненыя, што не — калі студэнтаў у інтэрнатах пачынаюць настойліва падахвочваць да датэрміновасьці, то гэта для чагосьці патрэбна. Ну, а калі не стаіць над душою наглядчык, то вольнаму воля:


— Ну, нарэшце! Ня мог дачакацца. Зараз бегма на "выбарчы" ўчастак, усіх сяброў і знаёмых пабуджу й бегма на "выбары"!


Альбо так:


— За каго галасаваць? Ня ведаю сваіх дэпутатаў. Па радыё толькі музыка, а ў мясцовай газэце пра спорт і кіно. Не пайду.


Каб уведаць, трэба даведвацца. Хто шукае, той знойдзе. Часам налучыш на якую цікавостку — любата! Шкада, што такі крэатыў — дый у нейкім мікрараённым зацішку.


Michalevic, напрыклад, няўзброеным вокам мімаходзь прыкмеціў вартыя, на ягоны густ, увагі постаці:


Большасьць кандыдатаў у дэпутаты на стэндах нагадваюць аб'явы "Іх шукае міліцыя". Але часам бываюць прыемныя нечаканасьці. Напрыклад, Тацяна Куўшынава з смайлікам на плякаце, хлопец у поўны рост у беларускай вышыванцы на плякатах на вуліцы Каліноўскага або малады чалавек з сабакам у Зялёным Лузе з дэвізам "Депутат — друг человека".


Так, не шануюць будучыя абранцы народу жартаў. Засяроджаныя: ці то як хірургі, ці то як снайпэры. Яшчэ цікава лічбы гадавых даходаў разглядаць ды адсочваць, як яны пасуюць да абліччаў. Часам, як бліскавіца зь ціхмянай хмары, мільгане: “Даходу ня мае”. А твар дыхтоўны такі… Зрэшты, я гэтым умысна не займаўся, але ж мо якім пільным назіральнікам ідэю падкінуць?


У суполцы minsk_by адбылося мімалётнае, але ўсьмешлівае абмеркаваньне на тэму: “дзе можна прачытаць пра кандыдатаў больш падрабязна, якія ўдзельнічаюць у выбарах на маім участку”. А й насамрэч: як на ўпакоўцы любога сынтэтычнага вытвару, на кандыдаце павінен друкавацца дасканалы сьпіс складнікаў і проціпаказаньняў. Заклапочанаму спажыўцу камэнтатары спачатку спрабавалі адказаць сур’ёзна, спагадліва. Але вясновы настрой, ці што — паблазнавалі трошкі:

— Лепшы кандыдат — Супрацьусіх. Адзіны, хто нават і блізка не падыходзіў да карупцыйных скандалаў, ніколі нават і на каліўца не парушаў свае абяцаньні, трымаў слова і ніколі нікога не пакрыўдзіў. Супрацьусіх — сапраўдны, шчыры народны кандыдат.


— Толькі вось, зараза, парушае выбарчае заканадаўства — па ўсіх акругах зарэгістраваўся.


— Не, не парушае. Ён проста жыве паўсюль і клапоціцца пра справы кожнага з нас. Амаль як прэзыдэнт.


Кандыдат, вядома, самавіты. Няблага спаборнічае з разнастайнымі суіскальнікамі заканадаўчай улады паўсюль на постсавецкай прасторы. Чаму не перамог дагэтуль? Прозьвішча, пэўна, цяжкавымаўляльнае.

XS
SM
MD
LG