Лінкі ўнівэрсальнага доступу

Ад 2009 году Беларусь скасоўвае прывязку свайго рубля выключна да даляра Злучаных Штатаў Амэрыкі. Пра гэта сёньня заявіў першы намесьнік старшыні праўленьня Нацыянальнага банку Беларусі Павал Калаур, выступаючы ў Палаце прадстаўнікоў. Што гэта можа азначаць для эканомікі і жыхароў Беларусі?

Спадар Калаур заявіў, што, пачынаючы з 2009 году, беларускі рубель будзе прывязаны не да даляра, як было раней, а да “кошыка валют”:

“Зьмяняецца рэжым валютнай палітыкі — ад прывязкі да даляра да прывязкі да „кошыка валют“. У яго будуць уваходзіць даляр, эўра і расейскі рубель”.

Першы намесьнік старшыні праўленьня Нацыянальнага банку тлумачыць навіну так:

“Вы ведаеце, якой непрадказальнай была дынаміка даляра адносна эўра: як зьмяншаўся яго кошт цягам месяцаў і як ён пасьля рэзка ўзьняўся”.

Кіраўнік аналітычнага цэнтру “Стратэгія” Леанід Заіка лічыць такі пераход станоўчым для эканомікі краіны:

“Гэта набліжэньне да таго, як павінна быць. У нашым кошыку будзе 42% эўра, 32% — расейскі рубель, а ўсё астатняе — даляр. То бок мы зьмяняем канфігурацыю. І яна адпавядае нашаму экспарту”.

А як гэта адаб’ецца на звычайным жыхары Беларусі? Ці ня прыйдзецца яму цяпер адсочваць курс нацыянальнай валюты ня толькі да даляра, але і да эўра, і да расейскага рубля? На гэтыя пытаньні Леанід Заіка адказвае так:

“Яму трэба будзе арыентавацца на адну-адзіную пазыцыю — гэта наяўнасьць у яго работы. І ня будзе ў яго галава балець ні ад даляраў, ні ад эўра, ні ад тугрыкаў. Галоўнае, ад чаго цяпер можа балець галава, — ці будзе ў яго працоўнае месца 8 сакавіка 2009 году? Гэта значыць, ці зможа ён купіць сваёй каханай жанчыне флякон духоў „Красная Москва“?”

Кіраўнік аналітычнага цэнтру Мізэса Яраслаў Раманчук кажа, што звычайнаму чалавеку ня будзе патрэбы ў наступным годзе “забіваць сабе галаву далярамі, эўра ды расейскімі рублямі”:

“Асноўны паказчык, на які трэба арыентавацца звычайнаму чалавеку, — гэта ўзровень інфляцыі. А яна сёлета складзе амаль 20%. Гэта вельмі крызісны і крытычны паказчык нашай эканомікі.

А тое, што адвязаліся ад даляра і прывязаліся да кошыка, дык гэта дае магчымасьць Нацбанку быццам па-навуковаму зрабіць беларускі рубель таньнейшым. І трэба чакаць, безумоўна, дэвальвацыі. Яе памеры будуць залежаць ад таго, колькі нам дадуць крэдытаў, як будуць працаваць нашы экспартэры і наколькі жорсткай будзе палітыка Нацбанку ў дачыненьнях з камэрцыйнымі банкамі, як ён будзе іх крэдытаваць”.

Паказаць камэнтары

XS
SM
MD
LG