Лінкі ўнівэрсальнага доступу

“Трэба, каб за няяўку на выбары давалі пажыцьцёвае зьняволеньне”


Агляд тэлефанаваньняў на “Свабоду” за 28 траўня, сераду.


Шаноўныя слухачы! Нагадаем: тэлефон “Свабоды” ў Менску 266-39-52, працуе 24 гадзіны на суткі. Нумар мабільнай сувязі для СМС-паведамленьняў: 375.293.912.224. Тэлефануйце і пішыце! Дзяліцеся навінамі, выказвайце сваё стаўленьне да падзеяў у Беларусі і ў сьвеце. Мы таксама чакаем водгукаў на працу Радыё Свабода.

“Субач, Вінаградаў, Дашук — нашы Кастусі Каліноўскія. Беларусы! Змагайцеся за свае правы, за справядлівасьць, за свабоду” — СМС такога зьместу мы атрымалі ад Аляксандра з Ушачаў. Гэта рэакцыя слухача на прысуд у крымінальнай справе, якую назвалі “справаю 14-ці”. Юнакоў зьвінавацілі ў парушэньні грамадзкага парадку падчас акцыі пратэсту прадпрымальнікаў 10 студзеня і пакаралі абмежаваньнем волі без накіраваньня ў спэцкамэндатуру. Тэлефанаваньні на гэтую тэму:

Спадарыня: “Мне сорамна, што я жыву ў краіне, дзе судзяць маладых людзей, якімі трэба ганарыцца. Ганьба такой уладзе! Трымайцеся, хлопцы! Жыве Беларусь!”

Спадар Рыбакоў: “Я пачуў пра прысуд маладым людзям і хачу выказаць сваё меркаваньне. Вось начапі на плячо муляж аўтамата АК-74 і прайдзі па Менску. Ніхто не падыдзе і не запытаецца, адкуль гэты аўтамат — можа, так і трэба. А вазьмі сьцяг нацыянальны і прайдзі па Менску, адразу вырашаць, што ты Ўсама бін Лядэн і нясеш атамную зброю. Вось такое ў нас заканадаўства. Трэба ў Палату прадстаўнікоў выносіць прапанову, каб за няяўку на выбары давалі пажыцьцёвае зьняволеньне. Усіх не пасадзяць. Але калі ўсе прыйдуць, можа, што-небудзь зьменіцца ў гэтай краіне”.

Спадар: “Хачу падзякаваць маці Андрэя Кіма і яму самому за тое, што яны зьяўляюцца прыстойнымі, прыгожымі людзьмі. І дай Бог, каб такіх мацярок і сынкоў у нас было як мага больш. Я таксама хачу падзякаваць тым маладафронтаўцам, якія змагаюцца і ідуць за краты дзеля адраджэньня сваёй Бацькаўшчыны”.

Спадар: “Мядзьведзеў ужо 20 дзён як прэзыдэнт, гаворыць пра свабоду, чаму ён тады не вызваляе 19 “палітычных,” якіх пасадзілі пры Пуціне? Таксама як ЗША -- наклалі б табу і на Лукашэнку за беларускіх палітвязьняў. Відаць, у іх траіх абутак на адну нагу”.

“Шаноўная “Свабода”. Растлумачце, калі ласка,чым адрозьніваецца Сусьветны банк ад МВФ. Якiя функцыі яны выконваюць?”— пытаецца слухач “Свабоды” ў СМС-лісьце. Яму адказвае палітык і эканаміст-міжнароднік Аляксей Янукевіч:

“Міжнародны валютны фонд перадусім быў створаны дзеля разьвіцьця міжнароднага гандлю і падтрымкі стабілізацыі ўсясьветнай валютнай сыстэмы. Хоць ён таксама займаецца крэдытаваньнем краінаў, якія разьвіваюцца. А Сусьветны банк быў створаны значна пазьней якраз з мэтай барацьбы з галечай і беднасьцю. Каб падтрымліваць тыя краіны, якія разьвіваюцца”.

На эканамічную тэму і наступнае пытаньне:

Спадар: “Чаму вы не пракамэнтавалі тое, што вывозіцца тавараў на 200 мільёнаў менш, чым увозіцца? Дык ці друкуюцца грошы ў Лукашэнкі, ці ў нас такія запасы даляраў? Як пакрываецца гэтая розьніца ў 200 мільёнаў, цікава было б даведацца ад вашых эканамістаў”.

На пытаньне адказвае палітык і эканаміст Яраслаў Раманчук:

“Гандлёвы балянс за чатыры месяцы гэтага году адмоўны прыкладна на 250—300 мільёнаў даляраў. Але гэта ня значыць, што ў Беларусі друкуюць даляры. Гэта можна кампэнсаваць коштам інвэстыцыяў, крэдытаў, што пасьпяхова робяць нашыя банкі і нашыя прадпрыемствы. Гэта пагражае толькі тым, што вельмі хутка растуць нашыя даўгі. І калі нічога не рабіць са структурай гаспадаркі, то праз 2—3 гады альбо трэба будзе паніжаць курс нашага беларускага рубля, альбо давядзецца аддаваць значна больш грошай на кампэнсацыю пазыкаў”.
XS
SM
MD
LG