Лінкі ўнівэрсальнага доступу

logo-print

Пайшоў з жыцьця тэатральны рэжысэр Барыс Эрын


22 лютага на 87-м годзе жыцьця памёр былы галоўны рэжысэр Нацыянальнага акадэмічнага тэатру імя Янкі Купалы Барыс Эрын.


Ён працаваў на гэтай пасадзе з 1964 па 1968 гады. Сярод найлепшых пастановак Барыса Эрына на сцэне тэатру імя Янкі Купалы — "Ліса і вінаград", "Забыты ўсімі", "Лявоніха на арбіце", "Людзі на балоце", "І змоўклі птушкі", "Вечар" і "Памінальная малітва".

Пра Барыса Эрына – тэатразнаўца Вячаслаў Ракіцкі:

“Барыс Уладзімеравіч Эрын – рэжысэр, які належаў шэрагу культураў. Дзе б ён ні ставіў свае спэктаклі, ён заўсёды выяўляў сутнасьць нацыянальнага характару, нацыянальнага кантэксту, у якім адбываліся падзеі, нават тады, калі ставіў усясьветную клясыку, якую ён вельмі любіў.

У ягонай творчасьці, а ягонае жыцьцё ў тэатры было вельмі доўгае, важным момантам быў час, калі ён ачольваў Нацыянальны тэатар імя Янкі Купалы. Спэктаклі Барыса Эрына – гэта цэлая старонка ў гісторыі тэатру Янкі Купалы. Спэктакль “Людзі на балоце” паводле Івана Мележа я асабіста лічу найвялікшым шэдэўрам беларускага тэатру ХХ стагодзьдзя.

Барыс Эрын змог разам з такімі акторамі, як Генадзь Гарбук і Лілія Давідовіч, выявіць здольнасьць беларусаў да пераменаў і цяжкі шлях адлучэньня ад зямлі і пошуку нечага новага, духоўнага, што знаходзіцца па-за межамі звыклага.

Зрэшты, сёньня беларусы яшчэ маюць магчымасьць паглядзець спэктакль Барыса Эрына ў тэатры Янкі Купалы – гэта пастаноўка п’есы расейскага драматурга Рыгора Горына “Памінальная малітва”.
  • 16x9 Image

    Ганна Соўсь

    Ганна Соўсь нарадзілася ў Менску. Скончыла факультэт журналістыкі БДУ. Працавала ў незалежнай газэце «Народная воля»(1997-2000). Ад 2000 году працуе на «Свабодзе». Кнігі на «Свабодзе» — «Дарога праз Курапаты» (аўтарка рэпартажаў), «Адзін дзень палітвязьня» (ідэя і ўкладальніца), «Адзін дзень палітвязьня. 2009-2011»(ідэя і ўкладальніца), «Жыцьцё пасьля раку» (аўтарка ідэі і каардынатарка праекту, рэдактарка). Аўтарка праекту «Расея і я», сэрыі інтэрвію з 12 экс-прэзыдэнтамі постсавецкіх кранаў. Сябра БАЖ.

XS
SM
MD
LG