Жалобны маратон пачаўся з затрыманьняў

На крыжах уздоўж дарогі ў Курапацкім лесе ўдзельнікі акцыі паставілі запаленыя зьнічкі. На гэтым акцыя скончылася.

Каля крыжа «Пакутнікам Беларусі» адбылася агульная малітва. Потым удзельнікі адзначэньня пройдуць крыжовым шляхам па Курапацкім лесе з запаленымі зьнічамі.

У Курапацкім лесе ўсталявалі новы крыж — прадстаўнікам інтэлігенцыі, якія загінулі ў ноч з 29 на 30 кастрычніка. Прысутнічала каля трыццаці чалавек, сярод іх маці палітвязьняў Мікалая Аўтуховіча і Алякандра Францкевіча, былыя палітвязьні. Прысутныя трымаюць бел-чырвона-белыя сьцягі. Да крыжа ўсклалі кветкі.

Да памятнага знаку рэпрэсаваным у парку Чалюскінцаў усклалі кветкі, запалілі каплічкі. Адсюль удзельнікі акцыі накіроўваюцца ў Курапацкі лес. Выступіў Вацлаў Нямковіч старшыня хрысьціянскай злучнасьці «Курапаты».

Удзельнікі маратону наведалі месца масавых расстрэлаў у Лошыцы. Ускладаньне кветак прайшло без затрыманьняў.

Удзельнікі маратону накіраваліся да пахаваньняў ахвяр сталінізму ў Лошыцы.

А 17-й гадзіне зьбіраюцца прыехаць у Курапаты.

Вызвалілі ўсіх удзельнікаў акцыі.



Апошняй з кійком выйшла Галіна Сіўчык. Міліцыянты хацелі забраць бел-чырвона-белы шалік, але яна не аддала.

Міліцыянты адпусьцілі Ганну Шапуцьку і Ільлю Дабратвора з сынам.

Удзельнікі акцыі кажуць, што будуць вымушаныя скараціць праграму жалобнага маратона. Але Курапаты яны абавязкова наведаюць. Канчатковае рашэньне, што рабіць далей, будзе ўхваленае, калі выпусьцяць усіх актывістаў.

Фотагалерэя: Шанаваньне памяці ахвяраў таталітарных рэпрэсіяў на Кальварыйскіх могілках

З пастарунку пачалі выпускаць удзельнікаў акцыі. Першымі выйшлі прадпрымальнік Алесь Макаеў і актывіст БХД Аляксей Шэін.

Галавін выйшаў да журналістаў, якія дзяжураць ля пастарунку і папрасіў адыйсьці ад будынку.

З пастарунку выпусьцілі журналістаў і прадстаўніцу Міжнароднай арганізацыі абароны правоў чалавека.

Да пастарунку міліцыі пад'ехаў мікрааўтобус з надпісам «Тэлебачаньне».

Міліцэйскі чыноўнік заявіў Радыё Свабода: у міліцыю патэлефанавалі з адміністрацыі Кальварыйскіх могілак і паведамілі, што на могілках адбываецца несанкцыянаваны мітынг — супрацоўнікі МУС вымушаныя былі рэагаваць.

Пры гэтым міліцыянт адмовіўся назваць сваё імя і прозьвішча.

Міліцыя разьдзяліла прысутных на групы. У затрыманых забіраюць мабільныя тэлефоны.

Перад будынкам пастарунку дзяжураць людзі ў цывільным.

Начальнік адзьдзелу аховы парадку Андрэй Галавін паабяцаў, што калі людзей затрымалі незаконна, у іх папросяць прабачэньня.

Міліцыянты прыйшлі у актавую залю. Яны патрабуюць не чыніць правакацыяў. Інакш паабяцалі, што затрыманых будуць трымаць цягам трох гадзінаў.

Затрыманыя кажуць, што мітынга не было, што яны толькі маліліся.

Міліцыянты кажуць, што будуць правяраць дакумэнты і браць тлумачэньні.

Журнлістаў хочуць правяраць асобна.