У СУБОТУ...
...ўдзень пераменная воблачнасьць, без ападкаў. У нядзелю — дождж. Тэмпэратура на выходныя: плюс 14–17.
НЕ ПРАПУСЬЦІЦЕ:
У суботу онлайн-канфэрэнцыя з Анатолем Лябедзькам і аўдыёзапіс апошняга выпуску праграмы «Зона Свабоды» для Белсату пра парлямэнцкія выбары.
У нядзелю ў перадачы «Праскі акцэнт» Віталь Цыганкоў і ягоныя госьці — Уладзімер Някляеў, Леў Марголін, Юрась Губарэвіч — будуць абмяркоўваць, што рабіць апазыцыі пасьля парлямэнцкіх выбараў.
У ГЭТЫЯ ДНІ Ў БЕЛАРУСІ І Ў СЬВЕЦЕ:
29 верасьня
Сёньня ў Гданьску Натальля Пінчук атрымае прэмію Леха Валэнсы, якая была прысуджаная яе мужу Алесю Бяляцкаму. Прэмія палітвязьню Алесю Бяляцкаму была прызначаная за ягоны "ўнёсак у абарону правоў чалавека і дапамогу людзям, якіх перасьледуюць беларускія ўлады".
У Белдзяржцырку (пр. Незалежнасьці, 32) у рамках міжнароднага музычнага фэстывалю Юрыя Башмета сусьветна вядомы джазавы скрыпач Жан-Люк Панці і яго група (Францыя) адзначыць свой 70-гадовы юбілей канцэртам «Клясыка сустракае джаз». Пачатак у 20.00.
Канцэрт гурту «Re1ikt » у Сьветлагорску, цэнтар «Тандэм», пачатак у 17.00.
30 верасьня
У Белдзяржфілярмоніі (пр. Незалежнасьці, 50) у рамках міжнароднага музычнага фэстывалю Юрыя Башмета адбудзецца канцэрт пры ўдзеле Дзяржаўнага акадэмічнага сымфанічнага аркестра Беларусі пад кіраўніцтвам Андрэса Мустонэна (Эстонія) і салістаў Аляксея Агрынчука (габой) і Аляксандра Бузлова (віялянчэль). Пачатак у 19.00.
Канцэрт гурту «Re1ikt »: у Рэчыцы ў мастацкай галерэі, пачатак у 15.00; у Гомелі ў клюбе «Імпэрыя», пачатак у 19.00.
***
Паважаныя наведнікі сайту! Дапамажыце больш поўна прадставіць беларускі дзень — дашліце інфармацыю пра плянаваныя падзеі, якія будуць цікавыя нашым чытачам, на адрас svaboda@rferl.org.
ТАКСАМА Ў ГЭТЫЯ ДНІ:
29 верасьня
1529 — зацьверджаны першы Статут Вялікага Княства Літоўскага, збор законаў фэадальнага права, помнік беларускага пісьменства і юрыдычнай культуры.
1872 — адкрылася Полацкая настаўніцкая сэмінарыя, якая праіснавала да 1918 году.
30 верасьня
1452 — Ян Гутэнбэрг выдаў першую друкаваную кнігу, якая атрымала назву «Біблія Гутэнбэрга».
1938 — з удзелам Брытаніі, Францыі, Нямеччыны і Італіі падпісана «Мюнхэнская дамова», паводле якой нацысцкая Нямеччына атрымала кантроль над Судэцкай вобласьцю Чэхаславаччыны.
30 верасьня — Міжнародны дзень перакладчыка, устаноўлены ў 1991 годзе Міжнароднай фэдэрацыяй перакладчыкаў у дзень сьмерці сьвятога Ераніма, які лічыцца патронам перакладчыкаў. Еранім быў хрысьціянскім сьвятаром і пісьменьнікам, народжаным у Далмацыі. Ягоным найбольшым дасягненьнем лічыцца пераклад Бібліі на лацінскую мову, вядомы як Вульгата.
Нарадзіліся:
29 верасьня
1823 — беларускі і польскі паэт Уладзіслаў Сыракомля.
1943 — заснавальнік польскага прафсаюзу «Салідарнасьць», а пазьней прэзыдэнт Польшчы, ляўрэат Нобелеўскай прэміі міру Лех Валэнса.
1958 — беларускі пісьменьнік Адам Глобус.
30 верасьня
1892 — беларуская пісьменьніца і грамадзкая дзяячка Зоська Верас.
1931 — народны паэт Беларусі Ніл Гілевіч.
Памерлі:
30 верасьня
1934 — беларускі гісторык і этнограф Мітрафан Доўнар-Запольскі.
1992 — беларускі мовазнаўца Мікалай Бірыла.
ЦЫТАТА НА ПАМЯЦЬ:
«Наша сустрэча не за гарамі
He за лясамі твой пачастунак.
He за палямі мой пацалунак.
Наша пяшчота не за марамі.
Хоць і паблытаны словы вятрамі,
Хоць і, забыўшыся на паратунак,
Пані Маркота кратае струны
Стомленай арфы ў колішнім храме.
Сумная поўня нам спачувае —
Вузкія сьцежкі асьвечвае ўпотай,
Хоць і хмурына поўню хавае.
Абавязкова горыч самоты
Мы да сустрэчы ператрываем,
Хоць і навокал стогнуць балоты».
Адам Глобус, «Ліст да каханай»
ГОД ТАМУ Ў ЗАГАЛОЎКАХ НА САЙЦЕ «СВАБОДЫ»:
Р. Сікорскі: Я ня ведаю нікога, хто б верыў, што Лукашэнка атрымаў 80% на выбарах
Афіцыйны Менск спыніў удзел у саміце Ўсходняга партнэрства