пятніца, 25 красавіка 2014, Менск 01:43

УСЕ НАВІНЫ / Культура

«Пры цяперашняй уладзе ў Беларусі канцэртаў ня будзе»

«Рабкор» — новы альбом гурту «Ляпіс Трубяцкі» — можна слухаць ад начы 1 траўня.

x
ПАМЕР ШРЫФТУ - +
Ён зьявіўся на сэрвісе «Яндэкс-музыка» ў рэжыме «стрымінгу» — бясплатнага праслухоўваньня.

Прэс-аташэ групы Аляксандар Бэргер кажа, што альбом выйшаў «жорсткім»:

«Рабкор» — адна з асацыяцыяў, якую назва выклікае, гэта жорсткія музычныя стылі, якія сканчаюцца на -кор: хардкор ці ска-кор. Такога «кору» будзе досыць шмат«.

Бэргер падкрэсьлівае, што альбом мае вострасацыяльнае гучаньне. У ім 12 трэкаў. Большую частку зь іх паклоньнікі гурту пачуюць упершыню. Але ў альбом увайшоў і добра вядомы трэк «Ня быць скотам» на словы Янкі Купалы.

Александар Бэргер: «Усе тэксты напісаныя Міхалком, апроч песьні „Ня быць скотам“, якую напісаў Янка Купала. Мабыць, беларуская мова Міхалка прагрэсуе — з кожным альбомам у яго ўсё больш беларускамоўных трэкаў».

Вокладку для «Рабкора» зрабіў мастак Уладзімер Цэсьлер. На ёй фотапартрэт беларускага мастака і рэкляміста Ігара «Міцька» Корзуна.

x
Уладзімер Цэсьлер: «Я лічу, што савецкая агітацыйная стылістыка — гэта непераўзыдзеная графіка і самыя лепшыя плякаты назаўжды. Самая лепшая графіка была створаная ў першыя гады савецкай улады. Я, дарэчы, спачатку зрабіў ружовую вокладку, але ім спадабалася чырвоная».

У 2011 годзе «Ляпіс Трубяцкі» быў прызнаны налейпшым расейскім гуртам. Сьведчаньне папулярнасьці музыкаў — жорсткі гастрольны графік. З турам «Ня быць скотам» «Ляпісы» аб’езьдзілі шматлікія гарады Расеі.

Мультымэдыя-часопісу 34mag.net удалося пабываць на адным з апошніх канцэртаў «Ляпісаў» у Маскве. Журналіст Антон Кашлікаў:

«Пакуль адчуваньне, што ў „Ляпісаў“ ад моманту выхаду альбому „Капітал“ (2007) усё ідзе ўгару. Гэта адзін з самых гастралюючых гуртоў на прасторах былога СССР. Напэўна, больш за іх езьдзяць і зьбіраюць толькі Стас Міхайлаў ці Алена Ваенга. У сакавіку-красавіку ў іх было па 25 канцэртаў у месяц. Пры гэтым яны даяжджаюць да тых месцаў, куды мала хто трапляе. Значыць, яны „ў плыні“, яны падабаюцца публіцы».

Але ў Беларусі верш Янкі Купалы ў жывым выкананьні Сяргея Міхалка наўрад ці можна будзе пачуць у бліжэйшы час.
А што яшчэ рабіць музыкантам, калі яны ня могуць канцэрты даваць? Ды нічога.

Аляксандар Бэргер: «Пакуль ніякіх плянаў наконт Беларусі быць ня можа. Ясна далі зразумець гурту, што ён не жаданы госьць на радзіме. Канцэрты немагчымыя. А што яшчэ рабіць музыкантам, калі яны ня могуць канцэрты даваць? Ды нічога. Пры цяперашняй уладзе ў нас ня будзе магчымасьці выступаць перад беларусамі».

«Ляпіс Трубяцкі» знаходзіцца ў чорным сьпісе забароненых музыкаў. Апроч таго, летась беларуская пракуратура вырашыла праверыць некаторыя выказваньні лідэра гурту Сяргея Міхалка. Нібыта ў словах музыкі ўтрымліваліся абразы на адрас кіраўніцтва краіны. За такое ў Беларусі можна атрымаць 2 гады зьняволеньня. Пасьля трохмесячнай экспэртызы крымінальную справу вырашылі не заводзіць. Але і Міхалка ў бліжэйшы час на радзіме фанаты не пабачаць.

Аляксандар Бэргер: «Мы стараемся арганізоўваць канцэрты ў памежных гарадах. Таксама робім бас-туры зь Менску на нашыя канцэрты, і, дарэчы, усё больш беларусаў прыяжджае.

Усясьветная прэм’ера «Рабкора», на якую чакаюць беларусаў, адбудзецца ў Крыме ў рамках «нулявога» дня фэстывалю «Джаз Кактэбель».

Аляксандар Бэргер: «На яго традыцыйна прыяжджаюць беларусы кожны год. Мы пастараемся зрабіць так, каб як мага больш народу прыехала на аўтобусах ці іншым чынам і атрымала задавальненьне ад песень, ад мора, ад прыроды».
Гэтая дыскусія закрытая.
Сартаваць камэнтары
Камэнтары
     
Імя:: гость
01.05.2012 16:28
Пусть бы Ляпис Трубецкой дал концерт в Польше или в Литве и помог бы по примеру Крамбамбули своим землякам и концерт прекрасный послушать, и съездить к соседям по городу побродить с бесплатными визами. А взамен получил бы такой аншлаг, которого даже в Москве не видел.

Імя:: ЛикБез Горад:: Минск
02.05.2012 02:02
Пишите, пожалуйста, на литературном белорусском языке, а не на этой тарашкевице...читать противно все эти "пасЬля" "плЯнау" "зЬ Менску"
Адказаць

Імя:: Renessaince Горад:: Miensk
02.05.2012 11:00
Дык а чым тарашкевіца не літаратурная? Ня кажучы ўжо пра тое, што мала хто размаўляе на літаратурнай мове (у т. л. і сп. ЛікБез), якая зазвычай адрозьніваецца ад гутарковай.
Ня ведаю як чытаць, а на слых гэта ж тая самая беларуская мова, да якой прывыклі (альбо не прывыклі) беларусы з тым самым сп. ЛікБезам.

Імя:: Алесь Горад:: Менск
02.05.2012 11:15
Усё ж не да канца ясна, калі справы на Міхалка не завялі, то чаму б і не прыехаць на Радзіму. Небясьпекі, выглядае, няма, а на Радзіму, зь песень адчуваецца, што гэтаму чалавеку хочацца.
Адказаць

Імя:: Ананім
02.05.2012 13:04
А што яму на радзiме рабiць? Сядзець маўчаць, каб не пасадзiлi?
Відэа