Лінкі ўнівэрсальнага доступу

У Беларусі зьявіцца радыё «Марыя»


Арцыбіскуп Тадэвуш Кандрусевіч
пачакайце

No media source currently available

0:00 0:01:15 0:00
Наўпроставы лінк

Каталіцкі касьцёл ў Беларусі рыхтуецца да адкрыцьця радыё «Марыя», якое будзе вяшчаць па-беларуску 24 гадзіны на суткі. Праекту паспрыяў сёлетні візыт у Беларусь старшыні Папскай Рады па сродках масавай камунікацыі арцыбіскупа Клаўдыё Марыі Чэльлі з Ватыкану. Пра гэта паведаміў мітрапаліт Менска-Магілёўскі, арцыбіскуп Тадэвуш Кандрусевіч падчас сустрэчы з журналістамі напярэдадні сьвята Раства Хрыстова.

Перадкалядная сустрэча з журналістамі — калі вышэйшыя герархі каталіцкага касьцёлу ў Беларусі падводзяць вынікі мінулага году і дзеляцца плянамі на будучыню — традыцыйная.

Як паведаміў арцыбіскуп Тадэвуш Кандрусевіч, гэты год стаўся асабліва плённым у навязваньні стасункаў беларускага касьцёла зь міжнароднай супольнасьцю і Ватыканам:

«Дэлегацыя беларускага касьцёла прымала ўдзел у Другім сусьветным кангрэсе Божай міласэрнасьці, які адбываўся ў Кракаве. Асабіста я быў запрошаны выступіць на Кракаўскім рынку, дзе былі тысячы людзей. І гэта было вельмі прыемна, што прадстаўнік Беларусі таксама можа прымаць удзел у сьвяткаваньні гэтага кангрэсу».

Беларускі каталіцкі касьцёл таксама адзначыў сваю прысутнасьць у сьвеце ўсталяваньнем мэмарыяльнай шыльды з тэкстам малітвы «Ойча наш» на беларускай мове ў кляштары Pater Noster у Ерузалеме, якая сталася 163-й сярод табліцаў на іншых мовах сьвету. У сваю чаргу Беларусь наведалі вышэйшыя духоўныя асобы Ватыкану, у тым ліку, кардынал Курт Кох, старшыня папскай рады ў справах разьвіцьця міжхрысьціянскага дыялёгу, і Робэрт Сара, старшыня папскай рады ў справах дабрачыннасьці, які атрымаў добрыя ўражаньні ад візыту, паведаміў Тадэвуш Кандрусевіч:

«Ён быў пад вельмі вялікім уражаньнем ад набожнасьці беларусаў і так сказаў: ну, дзе яшчэ можна ўбачыць чалавека, які б на вуліцы стаяў на каленях пад дажджом. І сапраўды, калі была эўхарыстычная працэсія — ішоў дождж, а многія людзі заставаліся стаяць на каленях. І гэта зрабіла на яго вельмі вялікае ўражаньне».
Ён быў пад вельмі вялікім уражаньнем ад набожнасьці беларусаў і так сказаў: ну, дзе яшчэ можна ўбачыць чалавека, які б на вуліцы стаяў на каленях пад дажджом.

Таксама зь візытам ў Беларусі пабываў арцыбіскуп Клаўдыё Марыі Чэльлі, які ў Ватыкане мае пасаду старшыні Папскай Рады па сродках масавай камунікацыі. У выніку гэтага візыту і перамоваў з прадстаўнікамі афіцыйных уладаў было прынятае рашэньне аб адкрыцьці ў Беларусі каталіцкага радыё «Марыя».

Прэсавы сакратар ксёндз Юры Санько: «На гэты момант у Італію высланы статут гэтага радыё „Марыя“, неўзабаве чакаем адказу. А затым распачнём рэгістрацыю ў дзяржаўных установах, а пазьней будзем займацца непасрэдна тэхнічным забесьпячэньнем, апаратурай ды іншымі тэхнічнымі сродкамі».

Сярод праблемаў, якія па-ранейшаму застаюцца паміж уладамі і касьцёлам — абмежаваньне альбо забарона на працу ў Беларусі польскім сьвятарам. Пра стаўленьне касьцёлу да сьмяротнага пакараньня, вынесенага адносна зьвінавачаных у выбуху ў менскім мэтро, Тадэвуш Кандрусевіч сказаў наступнае:
Мы стаім на прынцыповай пазыцыі, што неабходна ўвядзеньне мараторыю на сьмяротнае пакараньне.

«Мы не гаворым канкрэтна пра той ці іншы факт. Мы стаім на прынцыповай пазыцыі, што неабходна ўвядзеньне мараторыю на сьмяротнае пакараньне. Гэта адпавядае сучаснаму навучаньню каталіцкага касьцёла. І той рэзанас, які вы пачулі ў грамадзтве, паказвае, што грамадзтва не пасіўнае ў гэтай справе, а хоча мець адказы».

Каталіцкія герархі і журналісты таксама ўшанавалі хвілінай маўчаньня памерлага сёлета кардынала Казіміра Сьвёнтка. А на завяршэньне сустрэчы падзяліліся аплаткам — кавалачкамі белага хлеба, які сымбалізуе цела Хрыста — і пажадалі адно адному ўсяго найлепшага ў наступным годзе.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG