Пра гэта 28 студзеня праваабаронцу Алесю Бяляцкаму паведамілі з аддзелу прымусовага выкананьня Партызанскага раёну Менску.
Бяляцкі абскардзіў пастанову пра арышт часткі ягонай кватэры, дзе ён жыве зь сям’ёй.
Пастанову пра накладаньне арышту на 18/100 долі кватэры вынес загадчык сэктару № 2 аддзелу прымусовага выкананьня.
Алесь Бяляцкі абскардзіў яе на імя начальніка аддзелу.
У сваім адказе аддзел прымусовага выкананьня паведаміў, што Бяляцкаму адмоўлена ў скарзе «у сувязі з тым, што адпалі падставы для задавальненьня ці адмовы ў задавальненьні патрабаваньняў».
З тлумачэньня вынікае, што суд Першамайскага раёну Менску адклікаў вынесены ім выканаўчы ліст з аддзелу прымусовага выкананьня Партызанскага раёну Менску ў сувязі з «памылковым накіраваньнем дадзенага выканаўчага ліста», паведамляе «Вясна».
На падставе гэтага аддзел прымусовага выкананьня Партызанскага раёну адклікаў пастанову аб накладаньні арышту на маёмасьць Бяляцкага і пастанавіў завяршыць выканаўчую вытворчасьць.
24 лістапада 2011 году суд Першамайскага раёну Менску асудзіў старшыню Праваабарончага цэнтру «Вясна» Алеся Бяляцкага на 4,5 году пазбаўленьня волі з канфіскацыяй маёмасьці, якая належала яму на праве ўласнасьці — у тым ліку кватэры, у якой знаходзіўся офіс «Вясны».
