Старшыня ЦВК апавяла пра памылковую скаргу, прамаўчала пра аналягічную сапраўдную.
Лідзія Ярмошына распавяла журналістам, што атрымала памылковую скаргу на саму сябе. Яна назвала гэта «кур’ёзным выпадкам» і зьедліва адзначыла, што такая скарга паказвае ўзровень палітычнай культуры чалавека, які яе падаў.
Паводле яе слоў, адзін з назіральнікаў з Гомеля даслаў ёй скаргу на інфармацыйныя брашуры са зьвесткамі пра ўсіх кандыдатаў у прэзыдэнты. Назіральнік палічыў, што гэта «незаконныя агітацыйныя матэрыялы» і што трэба «пресечь незаконную деятельность». Паводле слоў Ярмошынай, гэтыя інфармацыйныя матэрыялы вырабленыя ЦВК, афіцыйна распаўсюджваюцца «Белпоштай» і ня ўтрымліваюць агітацыі.
Тым часам Ярмошына не згадала пра сапраўдныя скаргі на незаконную агітацыю: кандыдатка на прэзыдэнта Беларусі Тацяна Караткевіч падала скаргу ў Цэнтральную выбарчую камісію на свайго суперніка Аляксандра Лукашэнку. Яна патрабуе, каб Цэнтравыбаркам вынес яму афіцыйнае папярэджаньне за злоўжываньне адміністратыўным рэсурсам: у выбарчай кампаніі Лукашэнкі, сьцьвярджае кандыдатка, выкарыстоўваюцца тыя ж самыя сымбалі, якія выкарыстоўваюцца і для агульнай прапаганды ідэі выбараў.
Гэта не адзіны выпадак незаконнай агітацыі. Нядаўна «Эўрарадыё» зацікавілася плякатамі з выбарчым лёзунгам Лукашэнкі і ягоным фота, прычым без выходных зьвестак. Плякат, на які ў раённы выбаркам паскардзілася «Эўрарадыё», праз пэўны час зьнялі, хоць падобныя яшчэ можна заўважыць на стэндах, прысьвечаных выбарам.
Але такая друкаваная прадукцыя з прыкметамі агітацыі выходзіла і далей: на перадавіцы «Советской Белоруссии» ад 29 верасьня 2015 году можна заўважыць нешта падобнае да агітацыі за аднаго кандыдата. Побач зь вялізным надпісам «Калі ты за Беларусь, ГАЛАСУЙ», стаіць фота Лукашэнкі — аднаго з кандыдатаў, за якога можна прагаласаваць 11 кастрычніка.
Падобны выпадак з «Советской Белоруссией» быў у 2006 годзе, калі на перадавіцы фота Лукашэнкі і Ярмошынай падпісалі вялікімі літарамі: «Выбіраць нам».