Адміністрацыя магілёўскай калёніі № 15 на 3 месяцы пазбавіла журналіста Алеся Любенчука пасылак, перадач і спатканьняў, паведамляе праваабарончы цэнтар «Вясна».
Паводле праваабаронцаў, палітвязьня накіравалі ў калёнію на пачатку лютага. Па прыбыцьці, пакуль Алесь быў на карантыне, адміністрацыя калёніі ўжо пазбавіла яго пасылак, перадач і спатканьняў тэрмінам на 3 месяцы нібыта за «парушэньне правілаў унутранага распарадку».
- Алеся Любенчука затрымалі 26 траўня 2022 году ў вёсцы Крывічы пад Іўем (Горадзенская вобласьць), дзе ён займаўся аднаўленьнем гісторыка-культурнай спадчыны свайго краю.
- Яго абвінавацілі паводле ч. 3 арт. 361-1 КК (стварэньне экстрэмісцкага фармаваньня або ўдзел у ім). 27 кастрычніка судзьдзя Алена Ананіч зь Менскага гарадзкога суду прысудзіла Любенчуку 3 гады пазбаўленьня волі. Праваабаронцы прызналі яго палітвязьнем.
- Сёлета 24 студзеня Вярхоўны суд адхіліў скаргу журналіста і пакінуў прысуд у сіле.
- Зь лістоў Любенчука на волю вядома, што яшчэ ў менскім СІЗА № 1, дзе яго ўтрымлівалі спачатку, у яго значна пагоршыўся стан здароўя.
- Алесь Любянчук шмат займаўся дабрачыннасьцю, дапамагаў дзецям-сіротам, арганізоўваў турыстычныя паходы і аднаўляў гісторыка-культурную спадчыну Наваградчыны.
Змаганьне ўлады супраць недзяржаўных СМІ
У 2020–2021 гадах перасталі выходзіць на паперы шэраг незалежных газэтаў нацыянальнага і рэгіянальнага абсягу. Большасьць газэтаў спынілі выхад праз палітычны ціск пасьля публікацый — ім не давалі далей друкавацца ў Беларусі. Перасьлед працягнуўся ў 2022-2023 гг.
Праблемы з друкарнямі паўсталі перад рэдакцыямі выданьняў:
- «Белгазета»,
- «Брестская газета»,
- «Газета Слонімская»,
- «Информ-прогулка»,
- «„Комсомольская правда“ в Белоруссии»,
- «Лидер-пресс».
- «Народная воля»,
- «Новы час»,
- «Рэгіянальная газета»,
- «Свободные новости плюс»,
- «Ганцавіцкі час».
У многіх рэдакцыях і ў журналістаў дома прайшлі ператрусы. Некаторыя рэдакцыі зазналі некалькі ператрусаў.
Фінансавыя праблемы сталі прычынай закрыцьця яшчэ дзьвюх папулярных у сваіх рэгіёнах незалежных газэтаў. На пачатку мінулага году перасталі выходзіць «Барысаўскія навіны», а ў канцы 2020 году выйшаў апошні нумар газэты «Вольнае Глыбокае».
Мэдыя і мэдыяарганізацыі, прызнаныя ўладай «экстрэмісцкімі фармаваньнямі/арганізацыямі»: Радыё Свабода, Белсат, БелаПАН, Эўрарадыё, Tut.by, Kyky.org, Наша Ніва, Хартыя’97, Флагшток, Hrodna.life, Volkovysk.by, Маланка Медыя, «Бабруйск Online», «Брестская газета», Беларуская асацыяцыя журналістаў, Мост, Люстэрка, Ранак, Беларускі расьсьледавальніцкі цэнтар, Tribuna.com Беларусь, Ex-press.livе, Deutsche Welle Беларусь, UDF.by.
У Воршы па рашэньні пракуратуры заблякавалі рэгіянальны партал Orsha.eu, у Гомлі «Свободные новости Плюс», у Віцебску «Витебский курьер».
Некаторыя рэдакцыі самі вырашылі спыніць выхад папяровых вэрсій, як, напрыклад, «Информ-прогулка» ў Лунінцы ці «ЎзГорак» у Горках.
