Як паведамілі Свабодзе ў Львоўскім муніцыпальным мастацкім цэнтры, дзе арганізавана выстаўка, працы беларускага мастака выклікаюць вялікую цікаўнасьць ў львавян.
«За тры дні, пакуль дзейнічае выстава, яе ўжо наведалі 800 гледачоў», — сказала Свабодзе мэнэджэрка цэнтру.
Паводле яе, выстава, у якую ўключана 12 пратэставых плякатаў, будзе дзейнічаць да 14 сьнежня, а потым пераедзе ў іншы горад. У рамках выставы ў цэнтры адбудзецца лекцыя пра актыўнасьці беларускіх мастакоў у часе акцыяў пратэсту, якія пачаліся ў Беларусі адразу пасьля прэзыдэнцкіх выбараў.
Пасьля выбараў Уладзімер Цэсьлер пачаў публікаваць у сацыяльных сетках свае працы, а 21 жніўня вымушаны быў зьехаць зь Беларусі.
«Пагрозаў не было, але, як толькі я выклаў свой апошні пост са свастыкай, сказалі схавацца. Не казалі, што мне нехта пагражае, але сказалі: „Ты што, хочаш, каб цябе ўкачалі ў асфальт?“ Усе пачалі прапаноўваць дапамогу. І я, не чакаючы, пераехаў цяпер у іншае месца, тут недалёка», — сказаў ён тады карэспандэнту Свабоды.
