Аляксандар Лукашэнка 1 жніўня абмеркаваў з кіраўніцай часовай адміністрацыі «Белгазпрамбанку» Надзеяй Ермаковай сытуацыю ў банку, паведамляе прэс-служба кіраўніка Беларусі.
Лукашэнка падзякавай Ермаковай, што «ў цяжкі момант адгукнулася і фактычна выратавала банк і працоўны калектыў», і парасіў яе, «каб парадак быў у банку», бо «банк губіць нельга».
«Гэта банк, які, калі „Газпром“ ад яго адмовіцца, Гасподзь зь імі. Працоўны калектыў ёсьць, навыкі ёсьць, магчымасьці будуць. Мы Нацыянальным банкам будзем падтрымліваць гэты банк: там жа нашы людзі і нашы прадпрыемствы. Так, трапілі ў складаную сытуацыю з прычыны гэтых карупцыйных праяваў, але ў нас ёсьць вопыт утрыманьня ня проста на плаву банкаў, але і нармальнага іх функцыянаваньня», — сказаў ён.
Лукашэнка дадаў, што, як даклаў яму Старшыня Камітэту дзяржкантролю Іван Тэртэль, цяпер у «Белгазпрамбанку» няма катастрофы, сытуацыю «ўдалося стабілізаваць», і пабаяцаў зрабіць усё, каб людзі, якія ўклалі свае грошы, і нашы прадпрыемствы нічога ня страцілі.
«Асобай зацікаўленасьці газпрамаўскай я ня бачу, хаця, калі мы размаўлялі з прэзыдэнтам Расеі, ён мне таксама рэкамэндаваў: кажа, што банк можа працаваць, ня бедныя ў яго ўласьнікі — даслоўна. Таму, калі табе патрэбен гэты банк, ён мне сказаў, значыць, паспрабуйце папрацаваць так, каб гэты банк працаваў. Я кажу: мы толькі за, мы супраць ня будзем, але ён павінен працаваць па нашых законах», — распавёў Лукашэнка.
Як распавяла журналістам Надзея Ермакова, пакуль «Газпром» не ідзе на кантакт, паведамляе дзяржаўны тэлеканал «Беларусь 1». Паводле яе, перад часовай адміністрацыяй стаіць задача забясьпечыць стабільную працу банка, захаваць працоўны калектыў і застацца на тых жа высокіх пазыцыях, якія былі раней.
Амаль 20 гадоў «Белгазпрамбанкам» кіраваў Віктар Бабарыка. Траўні ён сышоў з банку і заявіў пра намер балятавацца ў прэзыдэнты Беларусі. У чэрвені Бабарыку затрымалі па абвінавачваньні ў арганізацыі супрацьпраўнай дзейнасьці.
15 чэрвеня Нацбанк Беларусі ўвёў у «Белгазпрамбанку» часовую адміністрацыю на чале з Надзеяй Ермаковай, якая да 2014 году кіравала «Беларусбанкам» і «Нацбанкам». «Газпром» назваў дзеяньні Нацбанку па зьмене кіраўніцтва «Белгазпрамбанку» супрацьзаконнымі.
Перасьлед Віктара Бабарыкі і яго прыхільнікаў. Што важна ведаць
- Віктара Бабарыку абвінавацілі ў «адмываньні» сродкаў, атрыманых злачынным шляхам (па частцы 2 арт. 235 КК), і атрыманьні хабару ў асабліва буйным памеры (па частцы 3 арт. 430 КК).
- У крымінальнай справе «Белгазпрамбанку» 122 тамы. Справу разглядаў Вярхоўны суд у будынку суду Маскоўскага раёну.
- 22 сакавіка абарона Бабарыкі заявіла пярэчаньні на прад’яўленыя абвінавачаньні, бо апісаньне, якое ёсьць у іх, не дазваляла ў дастатковай ступені зразумець, у якіх менавіта дзеяньнях абвінавачанага Бабарыкі ўгледзілі злачынства, заявіў адвакат Дзьмітры Лаеўскі. Таксама ён адзначыў, што ў абвінавачаньні няма апісаньня інкрымінаваных дзеяньняў з указаньнем часу, месца, спосабу, іншых абставінаў іх учыненьня. Адвакат папрасіў далучыць да матэрыялаў справы дакумэнт, у якім выклаў «дэфэкты абвінавачаньня».
- Віктар Бабарыка віны не прызнае.
Хроніка перасьледу
- 10 чэрвеня Аляксандар Лукашэнка даручыў заняцца праверкамі прыватных кампаніяў, якія нібыта звальняюць тых, хто адмаўляецца ставіць подпісы за вылучэньне альтэрнатыўных кандыдатаў. Ён загадаў «прашарсьціць гэтых пузатых буржуяў, каб яны несьлі адказнасьць за людзей».
- 11 чэрвеня ў «Белгазпрамбанку» і шэрагу іншых кампаній, у знаёмых патэнцыйнага кандыдата ў прэзыдэнты Віктара Бабарыкі прайшлі ператрусы. Камітэт дзяржкантролю заявіў аб завядзеньні крымінальных спраў за адмываньне грошай і ўхіленьне ад выплаты падаткаў у асабліва буйным памеры.
- Віктар Бабарыка назваў гэта атакай на яго асабіста, хоць сам у справе тады не фігураваў, і заявіў пра «палітычны характар» дзеяньняў сьледчых, якія ня маюць прамога кампрамату на яго.
- 11 чэрвеня арыштавалі каардынатарку выбарчага штабу Бабарыкі Сьвятлану Купрэеву па абвінавачаньні ва ўхіленьні ад выплаты падаткаў у асабліва буйным памеры.
- 12 чэрвеня Лукашэнка заявіў, што Бабарыка таксама датычны да справы, маўляў, «гэта адна шайка-лейка». Праз 4 гадзіны Дзяржкантроль заявіў, што мае доказы датычнасьці былога банкіра да злачынстваў.
- Фігурантамі «справы „Белгазпрамбанку“» сталі каля 20 чалавек.
- 15 чэрвеня Нацыянальны банк прызначыў у «Белгазпрамбанку» часовую адміністрацыю на чале з Надзеяй Ермаковай. Расейскія акцыянэры банку («Газпромбанк» і «Газпром») назвалі гэтае рашэньне незаконным.
- 17 чэрвеня ўлады арыштавалі без тлумачэньняў выбарчы фонд Віктара Бабарыкі з 100 тысячамі рублёў на рахунку.
- 18 чэрвеня затрымалі Віктара Бабарыку і яго сына Эдуарда Бабарыку — кіраўніка ініцыятыўнай групы. У дамах сям’і Бабарыкаў прайшлі ператрусы.
- Кіраўнік КДК Іван Тэртэль назваў Бабарыку «непасрэдным арганізатарам» «махлярскай схемы з адмываньнем грошай» з удзелам былых і дзейных топ-мэнэджараў «Белгазпрамбанку».
- 19 чэрвеня праваабаронцы прызналі палітвязьнямі Віктара, Эдуарда Бабарыкаў і затрыманых сябраў ініцыятыўнай групы.
- Штаб Бабарыкі падрыхтаваў да здачы 435 тысяч подпісаў.
- 20 чэрвеня адвакаты падалі пакет дакумэнтаў для рэгістрацыі Віктара Бабарыкі кандыдатам у прэзыдэнты.
- 2 ліпеня стала вядома, што Бабарыку вінавацяць па трох фінансавых артыкулах Крымінальнага кодэксу.
- 14 ліпеня ЦВК адмовіў Віктару Бабарыку ў рэгістрацыі празь неадпаведнасьць прадстаўленай дэклярацыі аб даходах і маёмасьці.
- 10 кастрычніка Лукашэнка сустрэўся зь Віктарам Бабарыкам і іншымі палітвязьнямі ў СІЗА КДБ.
- 17 лютага 2021 году пачаўся суд над Віктарам Бабарыкам і былымі супрацоўнікамі «Белгазпрамбанку». На працэс не пусьцілі нікога зь незалежных журналістаў.
- 6 ліпеня Бабарыку асудзілі на 14 гадоў пазбаўленьня волі. Вырак вынес судзьдзя Ігар Любавіцкі. Бабарыка не прызнаў віны, ягоныя абаронцы яшчэ раз заявілі аб палітычных матывах справы.
- 12 ліпеня стала вядома, што Бабарыку этапавалі ў ПК №1 у г. Наваполацак.
- 12 кастрычніка з ізалятараў выйшлі некалькі чалавек, затрыманых у справе «Белгазпрамбанку». Ім зьмянілі меру стрыманьня, але іншыя падрабязнасьці справы невядомыя.
- У кастрычніку 2023 году арганізацыя былых сілавікоў BelPol паведамляла, што Віктар Бабарыка ў калёніі мае праблемы з сэрцам. Паводле інфармацыі арганізацыі, Бабарыку нанесьлі «сур’ёзныя цялесныя пашкоджаньні», прычым зрабілі гэта людзі, якія не адносяцца да пэрсаналу наваполацкай калёніі, дзе той сядзіць.
