Лінкі ўнівэрсальнага доступу

«У інтарэсах нацыянальнай бясьпекі ЗША», — Трамп растлумачыў прычыны ракетнай атакі на Асада


Зранку 6 красавіка ЗША атакавалі ракетамі авіябазу Шайрат сілаў прэзыдэнта Башара Асада ў Сырыі ў адказ на меркаванае ўжываньне хімічнай зброі. Прэзыдэнт ЗША Дональд Трамп у тэлевізійным звароце патлумачыў прычыны атакі.

Раптоўны ўдар адзначыў рэзкі разварот у палітыцы Трампа, які летась вёў кампанію супраць уцягненьня ў канфлікты на Блізкім Усходзе, што ішла пад лёзунгам «Амэрыка перадусім».

Але пасьля меркаванага ўжываньня войскамі Асада нэрвова-паралітычнага газу на кантраляваным паўстанцамі сырыйскім мястэчку Хан-Шайхун у правінцыі Ідліб, у выніку якога загінулі сама меней 86 чалавек, Трамп заявіў, што ён быў узрушаны фатаздымкамі забітых дзяцей і што гэта «перайшло шмат межаў».

Напярэдадні атакі Трамп заявіў, што Асад мусіць сваю пакінуць пасаду, а дзяржсакратар ЗША заявіў, што «Асад страціў права кіраваць народам Сырыі». Пасьля ж атакі Трамп сказаў у кароткім тэлевізійным звароце:

«Сырыйскі дыктатар Башар аль-Асад учыніў жудасны напад з ужываньнем хімічнай зброі на нявінных цывільных асобаў. — З дапамогай сьмяротнага нэрвова-паралітычнага агенту Асад забраў жыцьці безабаронных мужчын, жанчын і дзяцей. Гэта ў жыцьцёва важных інтарэсах нацыянальнай бясьпекі Злучаных Штатаў, дзеля прадухіленьня і стрымліваньня распаўсюду і выкарыстаньня сьмяротнай хімічнай зброі».

Трамп у звароце абвінаваціў Асада ў парушэньні нормаў міжнароднага права і заклікаў «усе цывілізаваныя краіны» далучыцца да ЗША ў імкненьні пакласьці канец «бойні і праліцьцю крыві» ў Сырыі.

«Мы спадзяёмся, што пакуль Амэрыка стаіць за справядлівасьць, то мір і гармонія ўрэшце перамогуць», — вывеў Трамп.

Гэта першая мэтанакіраваная атака на аб’екты Башара Асада. Да гэтага кааліцыя на чале з ЗША наносіла ўдары толькі па цэлях, што пад кантролем тэрарыстаў «Ісламскай дзяржавы». У верасьні мінулага году самалёты кааліцыі бамбавалі пазыцыі войскаў Асада ў Дэйр-эз-Зора, але пазьней гэтую атаку ў Пэнтагоне назвалі «сумнай памылкай».

Каманда дасьледчыкаў Conflict Intelligent Team (CIT) адзначае: атакаваную цяпер базу Шайрат крыніцы ва ўзброенай апазыцыі лічаць месцам, адкуль вылецелі самалёты Су-22, што несьлі на борце хімічную зброю. ЗША афіцыйна пацьвердзілі, што лічаць рэжым Асада вінаватым ва ўжываньні газу, падобнага да зарыну, пры ўдары па правінцыі Хомс.

Ваша меркаваньне

Паказаць камэнтары

XS
SM
MD
LG