Лінкі ўнівэрсальнага доступу

У Магілёве працягваецца суд над праваабаронцам Андрэем Бандарэнкам. Абнаўляецца

абноўлена

Суд над праваабаронцам Андрэем Бандарэнкам. Магілёў, 29 сакавіка 2107 году
Суд над праваабаронцам Андрэем Бандарэнкам. Магілёў, 29 сакавіка 2107 году

Разгляд справы былога кіраўніка праваабарончай арганізацыі «Платформ Інавэйшн» Андрэя Бандарэнкі працягваецца сёньня ў судзе Ленінскага раёну Магілёва.Тэрмін ягонага зьняволеньня заканчваецца 31 сакавіка 2017 году.

Андрэя Бандарэнку вінавацяць паводле ч. 2 арт. 411 Крымінальнага кодэксу — у злосным парушэньні парадку адбыцьця пакараньня ў турме № 4. За тры дні да сканчэньня трохгадовай няволі Бандарэнку пагражаюць яшчэ два гады паводле другой часткі 411 артыкулу Крымінальнага кодэксу. Сваёй віны Бандарэнка не прызнае.

29 сакавіка судзьдзя Сяргей Мазураў дапытваў сьведак — кантралёраў і супрацоўнікаў магілёўскай турмы № 4, дзе адбывае пакараньне Бандарэнка. У кожнага зь іх Андрэй Бандарэнка і адвакат знаходзілі супярэчнасьці ў паказаньнях, аднак нічога зрабіць з гэтым не маглі. Практычна кожнае іхнае пытаньне судзьдзя Мазураў здымаў.

Дзяржаўны абвінаваўца Сяргей Мінаў таксама заявіў, што ніякіх супярэчнасьцяў у паказаньнях сьведак ён ня бачыць, чым выклікаў сьмех у зале.

Адвакат Бандарэнкі Вадзім Мушынскі папрасіў суд вынесьці апраўдальны прысуд, каб 31 сакавіка падабаронны змог абняць свайго бацьку. Мушынскі даводзіў суду, што яго падабароннага ўжо каралі ў дысцыплінарным парадку за правапарушэньні, якія далі падставы для крымінальнай справы. Таму, казаў адвакат, Бандарэнку нельга прыцягваць да адказнасьці паводле 411 артыкулу, паколькі будзе парушаны найважнейшы прынцып юрыспрудэнцыі: нельга караць за адно правапарушэньне двойчы.

Мушынскі зьвярнуў увагу суду, што справа Бандарэнкі рэзанансная, пра што сьведчыць, паводле яго, поўная заля людзей. Мушынскі адзначаў, што ў паказаньнях супрацоўнікаў турмы былі супярэчнасьці і яны «відавочна заблыталіся». Паказаньні не пасьлядоўныя, не праўдзівыя і трактуюцца супраць Бандарэнкі, настойваў адвакат.

Бандарэнку не давалі магчымасьці асабіста даваць тлумачэньні наконт таго, у чым яго вінавацяць, казаў Мушынскі. Тры эпізоды правапарушэньняў, паводле якіх распачалі справу, у судзе не даказаныя, лічыць адвакат. Адміністрацыя папраўчай установы пасьпяшалася з рапартам у Сьледчы камітэт, каб распачалі справу.

«Так, Бандарэнка няпросты асуджаны для папраўчай установы. Ён пісаў скаргі, і магчыма на іх так адрэагавала адміністрацыя», — выказаўся адвакат Мушынскі.

***

У выпадку асуджэньня Бандарэнкі паводле ч. 2 арт. 411 КК праваабаронцы будуць гатовыя прызнаць яго палітычным зьняволеным.

Андрэй Бандарэнка — былы кіраўнік праваабарончай арганізацыі «Платформ Інавэйшн», якая займалася маніторынгам месцаў зьняволеньня. У 2014 годзе яго прызналі вінаватым у хуліганстве, злосным хуліганстве і асабліва злосным хуліганстве ў дачыненьні да трох грамадзян і асудзілі на 3 гады калёніі ўзмоцненага рэжыму. Усяго на Андрэя Бандарэнку накладзена больш за дзясятак спагнаньняў у розных месцах пазбаўленьня волі, дзе ён адбываў тэрмін. Праз гэта былы кіраўнік праваабарончай «Платформы Інавэйшн» прызнаны злосным парушальнікам рэжыму. Цяперашні яго тэрмін зьняволеньня заканчваецца 31 сакавіка 2017 году.

У Ленінскім судзе Магілёва пачаўся разгляд крымінальнай справы супраць зьняволенага праваабаронцы Андрэя Бандарэнкі.

31 сакавіка ў Андрэя Бандарэнкі сканчаецца трохгадовы тэрмін пакараньня і ён мае быць вызвалены з-пад варты. Крымінальны ж перасьлед супраць яго, паводле праваабаронцаў, якія прыехалі на разгляд справы, ставіць пытаньне, ці будзе вызвалены Бандарэнка пасьля агучваньня выраку. Бо калі прысуд будзе абвінаваўчы, то яго абскардзяць, ён ня ўступіць у законную сілу, і асуджанага павінны вызваліць. Тым часам судзьдзя Сяргей Мазураў, як заўважылі прысутныя на працэсе, сьпяшаецца з разглядам справы.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG