«Пятай калёны тут няма», — Лукашэнка на «Вялікай размове з прэзыдэнтам». Анлайн

Сабралася каля 300 чалавек

На сустрэчу з Аляксандрам Лукашэнкам сабралася каля 300 чалавек, у тым ліку журналісты, дэпутаты, міністры, экспэрты, прадстаўнікі грамадзкіх арганізацый, сьвятары розных канфэсій.

Сустрэча адбудзецца ў Рэспубліканскім выставачным цэнтры, што ля Палаца Незалежнасьці, будынак нядаўна быў рэстаўраваны і пераабсталяваны.

Пачатак заплянаваны на 10 гадзін.

За круглым сталом — месцы, адведзеныя для журналістаў.

Журналісты занялі свае месцы і чакаюць пачатку прэс-канфэрэнцыі.

Прадстаўнікі грамадзкасьці, сьвятары, чыноўнікі.

«Пятай калёны тут няма»

«Без дыялёгу сёньня нікуды. Заўтра тым больш», — з гэтых слоў пачаў сустрэчу Аляксандар Лукашэнка.

Ён адзначыў, што на сустрэчы сабраліся ня толькі журналісты, але і прадстаўнікі грамадзкасьці. Лукашэнка заклікаў абмяркоўваць абсалютна ўсё і выказваць свае думкі. «Мы сабраліся не для піяру. А калі гэта і піяр, то ён павінен быць успрыняты нашым народам», — заявіў ён.

Паводле Лукашэнкі, на сустрэчу былі запрошаны ня ўсе: «Пятай калёны тут няма. Тут ёсьць людзі, што апазыцыйна думаюць, якія не галасавалі за прэзыдэнта, але яны любяць сваю краіну і зь імі я гатовы гутарыць».

«Паглядзіце, што робіцца на Данбасе»

Лукашэнка адзначыў, што некаторыя скептычна ставяцца да ягоных слоў аб прыярытэце бясьпекі і міру ў краіне. «Тых, хто так кажа, я адпраўляю на Данбас. Няхай паглядзяць, што там робіцца», — заявіў ён.

Валер Карбалевіч

Дыялёг з самім сабою

Супярэчнасьць закладзеная ў самым пачатку. Лукашэнка кажа, што цяпер без дыялёгу нікуды, што тут прадстаўленае шырокае кола беларускай грамадзкасьці. Аднак у зале бачу ў асноўным чынавенства, работнікаў дзяржаўных структураў, прыдворных палітолягаў. Незалежнае грамадзтва прадстаўленае вельмі слаба. Апазыцыя не прадстаўленая ўвогуле, бо, паводле Лукашэнка, яна «пятая калёна». Тады з кім дыялёг? З самім сабой?