Падчас цырымоніі на мэмарыяльнай плошчы ў Нью-Ёрку, якая будзе перарывацца шасьцю хвілінамі маўчаньня, зачытаюць імёны 2983 загінулых у выніку тэракту. Чатыры зь іх адзначаць дакладны час, калі сагнаныя самалёты ўрэзаліся ў Сусьветны гандлёвы цэнтар, у будынак Пэнтагону непадалёк ад Вашынгтону і ў поле ў штаце Пэнсыльванія. Дзьве апошнія хвіліны маўчаньня адбудуцца ў тыя моманты, калі 15 гадоў таму вежы паўночнага і паўднёвага хмарачосаў паваліліся.
Цырымонія будзе праходзіць з удзелам паліцэйскіх і пажарных побач з двума адлюстравальнымі басэйнамі з вадаспадамі, якія цяпер знаходзяцца на месцы, дзе стаялі вежы-блізняты. Больш за 340 пажарных і 60 паліцэйскіх загінулі ў той аўторак 2001 году падчас найгоршага нападу на ЗША з часоў нападу японцаў на Пэрл-Харбар ў 1941 годзе. Многія з пажарных загінулі падчас руху ўверх па лесьвіцы, калі яны спрабавалі выратаваць людзей, якія апынуліся на верхніх паверхах вежаў-блізнят.
У сваім штотыднёвым радыёзвароце ў суботу прэзыдэнт ЗША Барак Абама назваў гэты дзень «адным з самых змрочных дзён у гісторыі краіны», але падкрэсьліў, што «асноўныя каштоўнасьці, якія вызначаюць амэрыканцаў як народ, удалося захаваць».
Кандыдаты ў прэзыдэнты ЗША ад Дэмакратычнай партыі Гілары Клінтан і ад Рэспубліканскай — Доналд Трамп наведаюць сёньня месца трагедыі ў Нью-Ёрку.