Ва ўнутрыпалітычным разьдзеле, як паведамляе Голас Амэрыкі, выкладзеныя даволі традыцыйныя для Рэспубліканскай партыі пастуляты, заснаваныя на памяншэньні ролі фэдэральнага ўраду ўнутры краіны, зьніжэньні падаткаў, скарачэньні асыгнаваньняў на барацьбу з глябальнай зьменай клімату.
У зьнешнепалітычным разьдзеле рэспубліканцы, сярод іншага, крытыкуюць замежную палітыку Барака Абамы ў дачыненьні да Расеі ды надаюць пэўную ўвагу Ўкраіне і іншым постсавецкім дзяржавам.
У праграме пазначана, што з-за дзеяньняў Барака Абамы было прынята рашэньне не разьмяшчаць сыстэмы супрацьракетнай абароны ў Польшчы і Чэхіі, а ў падпісанай ім амэрыканска-расейскай дамове аб скарачэньні стратэгічных наступальных узбраеньняў (New START) няма адэкватных мэханізмаў вэрыфікацыі і кантролю, што прывяло да таго, што стратэгічны арсэнал ЗША скарачаецца, а Расеі — расьце. У праграме таксама адзначаецца, што з-за слабасьці цяперашняй адміністрацыі ЗША Расея акупуе частку тэрыторыі Ўкраіны і пагражае сваім суседзям «ад Балтыі да Каўказу».
«Мы падтрымліваем дзеяньне і, калі неабходна, супольнае з нашымі саюзьнікамі ўзмацненьне жорсткасьці санкцый у дачыненьні да Расеі да таго часу, пакуль ня будзе цалкам адноўлены сувэрэнітэт і тэрытарыяльная цэласьць Украіны. Мы таксама падтрымліваем наданьне неабходнай дапамогі ўзброеным сілам Украіны і большую каардынацыю з НАТО ў галіне нашага абароннага плянаваньня», — гаворыцца ў праграме.
У праграме таксама ўтрымліваецца абяцаньне надаваць больш увагу краінам Эўразіі — «былым часткам Савецкай імпэрыі», якія «заціснутыя паміж двума аўтарытарнымі суседзямі». Аўтары праграмы заклікаюць інтэграваць дзяржавы рэгіёну ў глябальную эканоміку, што дазволіць паменшыць уплыў радыкальных ідэалёгій.
