Імпрэзу, якая адбылася далей, арганізатары назвалі «прэзэнтацыяй вуліцы», якая зь перайменаваньнем набыла новае аблічча.
Тут зьявіліся новыя шыльды, а на некаторых будынках валянтэры намалявалі малюнкі у стылі супрэматызму, пачынальнікам якога быў Казімір Малевіч, а ў будынку, дзе раней мясьцілася мастацкая вучэльня, дзе выкладалі абодва мэтры, пасьля рамонту адчыніцца музэй, прысьвечаны навучальнай ўстанове, якая прынесла Віцебску славу «сталіцы мастакоў».
Пасьля таго, як кіраўніцтва горада і вобласьці ўсклала кветкі да мэмарыяльнай дошкі, у гэтым куточку Віцебска — ад цэнтральнай вуліцы імя Леніна да ўзьбярэжнай імя Калініна — прайшло тэатралізаванае прадстаўленьне «Улица Марка Шагала — шагала, бежала, летала...»
Нядаўна пакладзены асфальт навучэнцы мастацкіх школ і гурткоў размалявалі каляровай крэйдай. Самадзейныя артысты прайшлі пярэстай калёнай, трымаючы над галовамі паўпразрыстую цырату. Яна сымбалізавала ці то бег часу, ці аблокі ў небе над Віцебскам, у якім вольна лёталі шагалаўскія пэрсанажы, ці рэвалюцыйныя навальнічныя хмары.
Далёка ня ўсё спадабалася жыхарам вуліцы Марка Шагала. У прыватнасьці, тое, што добраўпарадкаваньне і абнаўленьне відаць толькі звонку. Унутры дамы дастаткова даўняй пабудовы так і засталіся без рамонту.
Прэзэнтацыя вуліцы Марка Шагала прайшла ў межах сьвяткаваньня Дня горада — ягоных 1042-х угодкаў, якія будуць адзначацца тры дні.
25 чэрвеня, сярод іншага, пройдуць «Парад вышыванак» у культурна-забаўляльным комплексе «Задзьвіньне» і «Сьвята ветру» ў парку «Мазурына», дзе будуць запускаць паветраных зьмеяў ды ладзіць летні кірмаш з вырабамі народных майстроў . 26 чэрвеня ў Віцебску нарэшце адчыняць мэмарыяльную дошку ў гонар паэта Давіда Сімановіча, патрыёта роднага гораду, які шмат зрабіў для ўшанаваньня памяці і Марка Шагала, і Васіля Быкава, і Ўладзімера Караткевіча. А на плошчы Перамогі, сярод шэрагу спартовых мерапрыемстваў з удзелам БРСМ, арганізатары анансуюць акцыю «Размаўляй па-беларуску».
